BIBLIOTHECA AUGUSTANA

 

Ulrich Ellenbog

um 1435 - 1499

 

Consilium de ptisi

 

Cappittel 4

 

____________________________________________________________

 

 

 

Larung vnd füllung.

 

Sy sol ir yn essen vnd trincken nit abpruch thun also isz ir fasten verpotten wan da durch kurtzet sie ir leben. Offt vnd dick sol sie essen ond nit vil uf ain moel, also mag sy ze 5 stunden alweg essen oder nachher nach dem sy enpfindet den magen syn towung volendet haben, dar uf sye groß vnd flissig acht haben sol wan sie kayn spyß sol nissen, der mag habe dan die forderigen spiß vertrukket. Och ist der mag yn keinen weg mit vil spiß ze beladen, noch mit tranck; hier vmb sol sie dick essen vnd lutzel. Allain wo not ist, wane sie ist herter stulgeng, mag sie cassia fistula pruchen oder ein clistier daß gar senfft syhe an artznye, alß ein veiste Hennen prwe oder ein pru von kalbs houptern oder kalb fussen oder kross oder schwiny füß vnd der glich mit gar lützel saltz. wo och ditz pruen nit vast veist ist, sol man vil pawmol oder schmaltz dar yn thun. Ist nit wo ditz clistier lang ym lib welibet, sunder eß ist guet vil ursach halben, die nit not sindt hie ze schriben; eß wurde ze lang, da eben dick mag man wie obstant clistiren. Ich such durch diß nit vil stulgeng sunder fuchtung vnd spisung deß vnderen libeß. Ich sprich vil stulgeng sein ir vast schadlich vnd wo sie ein ruoren an kumet, ist vast schadlich vnd sorcklich. daß selb ruor och pald man stellen muoß vnd sol davon ouch lang ze schriben ware. So es aber ein sundrige materi ist, so lan ich sie hye och stan; wo not ist, vindet man wol raut.