Minnereden

Quelle:

Cod. Pal. germ. 313

(Die Blattangaben führen jeweils zu den

Originalseiten der Heidelberger Handschrift)

____________________________________________________________

11.

Liebesgespräch

Fassung II

[479r]

Unschalcklich wil ich fragen, nu

thu bescheiden mich, fraw.

schaw, bitt ich dich, und rat mir eys.

heis stat myn girlich gedencken,

5

blencken hin und her far ich sinlos,

gros suffczen dragen myn synn.

bin ich ein mensch, das ist mir vergessen,

besessen so hatt mich ein bild.

wild stet es mir, fraw, dar umb schecz,

10

secz mir zu rẅ senden schmercz,

hercz und gedencken, ynlichkeit dar zu hant.» –

«erfand sie das, myn freund, sag an,

kan ich nit raten dyner mein?» –

«nein, fraw, ir wird mich erschrecken dut.

15

frut frewd mir nun drurn gitt,

sitt das myn lob ist grob unnd swach,

ach, gegen ir nach der ich stirb.» –

«wirb iren gnaden uemer zu!» –

«nu bin ich unwirdiger ir knecht

20

recht doch der mynn gnedig stat.

rat fruntlich, fraw, mir daruff wol.

[479v]

sol sie myns dinsts geruchen,

suchen wil ich durch sie all lannd.» –

«Erkant, frund, ist mir nit, doch hor:

25

stor vor ab unczucht, rom vermyd,

lid an dem lib umb frawen er,

ler al hubscheit gar, vernym:

zym irm gebot uemer glich.

rich gedruwes muts soltu sin,

30

hin und jo fraw fur sich dar,

war nym zu ir,

verbir nit, sy fry, frisch unnd dinstbar unverdrossen,

verschlossen in dir und verswig:

sich das dich begnaden mag.

35

sag auch menglich guts nach,

enpfach geselschafft mit den besten

gesten, eruet dick dich unnd sist milt;

hilt dich auch hertlicher strick,

erschrick nit hart, gnad dir beschicht.

40

sicht das din drut gemahel, spil

vil gros sie drachtet,

achtet dinen lon

schon dusentvalt.

alt núw, nach und var,

45

zwar es wirt zu letczt doch schin,

in ir ersterckt doch gutter wan.

bestan machtu sin lieben dag.

Hor, gnedig fraw, nueme gutlich dis:

gewis bistu von der ich sagen,

50

dragen wil ich dir ewig huld

schuld mir das zu keynem argen nyt,

gebyt mir wie es dutt myn drw,

bw frilich daruff, myns herczen brut,

drut myniglichs kind,

55

erfind unnd glaub:

raub mich mynr pin,

din gnad entschlus,

flus miltiglich zu mir din stur,

dür ist mir anders aller drost,

60

lost, fraw, din gnad nit selber mich

[480r]

brich ab din ungnedickeyt,

spreyt mir din gnad, oder ich bin dot.

not duld ich umb dynen eynigen gunst.

kunst unnd vernufft ist clein an mir,

65

dir dannoch all myn begird seyt:

leyt hab ich nach dir dag unnd nacht.

macht du des hast,

ast seliger frucht,

zucht, wonschlich heil.

70

geil, fraw, mich sol machen

lachen in dynr lieb kund.

fund ich das nit, so gros wart

hart lydens an mir nye gesehen.

jehenn muß ich das cleglich.» –

75

«Es sy dir, drutt gesell, ein schimpff.

glimpff weistu unnd ern gnug,

gefug ist mir zwar bliben ein,

kein sonders thu mir mut doch.

joch dich erlas,

80

maß dich so sprechen;

brechen enkanstu mynen mut.

gutt fruntschafft hab ich mit dir sust.

gewust hann ich vonn erst nit so.

do ich dir nach dyner clag ryet,

85

beschiet ich dich als ich mich verstund;

unkund wir was

das nun din clag mir vergicht.» –

«Bericht hat dich, fraw, selig kunfft,

vernunfft wonschlich din bild schneid;

90

becleid mit frewdenricher wat,

bedacht ist synlich din jugent.

dugent wunsam,

stam adels bris,

vlis ist an dir zumal ergangen.

95

belangen umb dinen czarten grus

muß ich dann, werder turer lip,

wiplichenn wandels has,

was ußerwelt die welt nit hat.

dat mich din wird,

100

gird volg ich inlieber pflicht.

[480v]

entricht hatt mich so gar din lust,

brust villicht, fraw, din gnad mir gan,

van gnaden rich. nein, das besorg:

borg drw mit wider gilt,

105

wilt du behalten mir myn leben.

geben hab ich mich dinem willen.

stillen myn drurn du solt,

holt fraw hochgeborn.

erkorn hab ich diner genaden bast,

110

vast mich dir haltet leyder streng.

verhenng das, fraw, nit, ich des bedarff.

scharff, strenng sind all din wort,

hort liebster mich din dugent zelt.» –

«Erwelt hastu dir ungemach.

115

sprach ich dir rat, es do kam.

nam das din mut uff myn erfern,

enbern will ich sin hin fur me.

stee, schrit,

ryt oder ge, la

120

da von ab,

hab gegen mir rẅ,

lẅ, anders wer din pin erwert!

widerfert dir heil, das walt got!

gebot ich dir nye zu gewarff:

125

reden machtu grossen kumer,

dumer red ist vil gesprochen.

zerbrochen wirt nit myn meynung,

eynung ist mir die best wal.

zal dich darvon, in komer blib,

130

drib nit me red dann vil!

stil sag ich dir unnd offembar:

furwar din red sie wegen.

pflegen, frund, muß dir da mit gluck.

druck dinen smerczen, ob es so sy!

135

nie mich gelanng

kranck haben yemants uffenthalt.» –

«Gewalt die wil gnad han,

herman ich dich, fraw; angeschruwen

ruwen las dich myns muts; sterben

140

werben muß ich [481r] gar on gewer.

gener den schaden,

laden dynen rum,

blum wonicklich unnd lieber gast.

rast, rü ist doch mir gar benomen,

145

komen kann ich des numer wider.

nyder mir das leg, dar an myn sun

thun machstu mir licht unnd schwer.

wer ich ein heyden,

leiden mocht dir myns jamers spalt.

150

gestalt hastu, fraw, hoher selden,

melden mus ich dir druwen bant,

zerdrant gegen mir din gunst wirt numer,

umer halt ich dir drw vest,

zelest also es erst an gie.

155

ye lennger du mir lieber bist.

frist, fraw, myn hoffen!

droffen sentlich

sich, fraw, myn ser:

ker das unnd wend!

160

endt gitt mir anders dies welt,

felt wunnen.

nen, la dich erbarmen,

armen jamerqual

dol ich frund unnd arg.» –

165

«Starck, frunt, wunsch ich dich unnd frum.

kum nit me so, es ist gnug gerett,

weth sie unser beyder gesprech.

brech ich nit ab, es wer unnücz.

schucz und mas zu allen dingen

170

gelingen dir well,

gesell, allzyt.

wyt sy din segen,

verwegen dich!

ich wil behalten eynikeit.

175

beit nit me myns drosts, dann ich keym

gheim wil sin, sprich

ich dir on all hellenn.»

Amen.