BIBLIOTHECA AUGUSTANA

 

Oswald von Wolkenstein

um 1376 - 1445

 

Handschrift A

 

____________________________________________________________

 

 

 

XXVII

(HS A 16r/v, Klein 120)

 

I

FRäw dich dw weltlich creatür/
daz dir nach maiſterlich' kür/

gemeſſn' iſt rain all dein figur/

Verglanczt ze tal nach d' mensur/

5

an tadel/ adel/ krefftiklich dar Jnn v'ſloſſn'/

der poſſn'/ goſſn'/ iſt an mayl/

dem er ſich geben hat zu taÿl/

der mag ſich des erfrewen wol von herczen/

 

II

Ain höbtlin klain dez nam ich war/

10

dar auff krawß plank krumliert das har/

zwo ſmale pra die euglein clar/

ain mūdlein rubein roslein var/

naß kỹn vnd kel/ das vell/ blaich wais mit wenglin prinnē/

dye tynnen/ synnen/ volgeſtackt/

15

von Jungn' Jarn' dar Jnn verſtrakt/

dankh hab ain mān der es ſchon wurcht an ſmerczn'/

 

III

Wān ich durch all meỹ ſinn betracht/

des bildes form leib ſchon vnd macht/

wie es der maiſter hat bedacht/

20

vnd darnach genczlich wirt volbracht/

daz kain/ so rain/ Jr geleich auff erd mug ſymuliern'/

regniren/ pulchrier'/ wie man wil/

gewalticlich behalt ſie daz ſpil/

mit ern' zwar tar ſie wol ernſtn' vnd ſcherczn' –