38

Von drey Graffen
so auff die Furstlich Hochzeitt zu Munchen
jn eyl gebracht Worden:

Drey Furnemer Grafen Sun (.So notthalben nicht zu melden sein.) die zu Wittemberg gestudiert haben / kamen auf ein zeit zusamen redeten vnder einander Vom herrlichen bracht / so auf der Hochzeit zu Munchen mit dess Herzogen oder Fursten Sohn auss Bayern sein Wurde / Vnnd wunschten also das Sie nur ein halbe stundt da sein mochten /

Vnder sollichem gesprech fiel dem Einen Der Doctor Faustus ein / vnnd sprach zu den Andern zweyen Grafen. Meine Vettern so jr mir wolt volgen / schweigen / vnnd nit Lautbrecht sein / So will jch Euch Rath geben / Das wir die Hochzeit sehen können / vnnd dann zu Nacht wider zu Wittemberg sein / Vnnd ist diss mein Muethmaß / Das wir zum Doctor Fausto schickhen jm vnser Furnemen erzellen / vnnd kundt thuen / Jn daneben mit gelt stechen / Er wirt vns sollichs nit abschlagen /

Diser deliberation waren Sie Einhellig / schickhten nach dem Fausto / welcher Der Schenckh halben / vnnd dann jrer Banckhet so jm Rathlich bewisen Content Drumb jnen hilfflich zusein zuesagte/

Als nun Die zeit erschin / Das dess Fursten Sun auß Bayern Hochzeit Celebriert solt haben / fordert Doctor Faustus Sie jnn sein hauß / befilcht jnen Sie sollen Sie auf das schonest klayden mit allem Ornat so sie haben / Nimpt hernach ein braitten Mantel / brait jn jnn seinem Garten Den Er neben seinem hauß hett / Vnnd setzt Die Grafen darauf Er Mitten hinein / vnd befilcht jnen höchlichen / das keiner mit keinem so lang Sie auß sein rede / Auch wann Sie schon jnn dess Bayern Pallast seyen / vnnd man mit jnen reden wolt kein antwurt geben solten / Disem allem verhiessen Sie zu gehorchen /

auf solche ermanung setzt sich Doctor Faustus nider / hebt seine Coniurationes ahn / baldt kompt ein grosser windt / Der bewegt das Tuech / vnnd fuert Sie also jnn Lufften dahin / Das Sie zur Rechten zeit gen Munchen jnns Fursten hof kamen / Dann sie fueren jn luften vnsichtbar dessen niemandt gewar worden /

Sie kamen jns Bayrn Pallast vnnd Saal / des der Marschalckh war nam / zeigt dem Fursten jnn Bayrn an / wie alle Fursten / Graffen vnd herren schon zu Tisch gesetzt sein / Daussen aber stehn noch Drey herren mit ainem Dienner Die Erst herkommen sein / Die zuempfahen / Das thett der Alt Furst jnn Bayrn / sprach jnen zue / Sie aber wolten kein einigs wortlein reden / Das geschach am Abent als man das Nachtmahl wolt empfahen / Dann Sie sunst durch des Faustj kunst den ganntzen tag sollichen bracht vnsichtbar ohne hindernus gesehen hetten.

Nun merckht als jnen wie oben gehört Doctor Faustus ernstlich verpotten den tag mit niemandt zue reden / Auch so bald Er sprechen wurdt wolauf / solten Sie an den Mantel greiffen / So werden Sie augenblickhlich dauon wischen.

Wie nun der Furst jnn Bayern mit jnen redet Sie jm aber kein Antwurt gaben / vnnd man jnen doch Das hand wasser raychet / Weyl da ein Graf gethon wider das gebott Faustj. Doctor Faustus hueb an zuschreyen Wolauf / bald wischen die zwen Grafñ so sich an den Mantell daruon / Der Dritt / So sich versaumbt / ward aufgefanngen / vnnd jnn ein gefenngknus geworffen / Die andern zwen Grafñ kamen vmb Mitternacht gen Wittemberg gehueben sich vbel von wegen jres andern Vettern dess Grauen. Doctor Faustus gab jnen Vertröstung jne auf Morgen frue zue erledigen etc.

Nun ward der Arme Graue höchlich erschrockhen Das Er so verlassen ward / auch jnn ein verhafftung eingeschlossen mit huettern verwart / Darzue ward Er gefragt was das fur ein gesicht gewesñ / mit den Andern Dreyen so verschwunden / Vnd was es sein möchten / Der Graff gedacht Verrath jch Sie so wurdt es ein böesen Ausgang gewinnen / gab allen gesanndten kein antwurt / Also Das man den tag kein antwurt auss jm hett bringen mögen / Derohalben jm Letzlich bescheidt worden / Das man jn zue Morgen mit dem Carcer vnnd Peinlicher frage zureden bringen wolt /

Der Graff gedacht bej jm selbs / es ist mit der Frag auff Morgen dahin gericht / Vnnd wann Doctor Faustus jn nicht erledige/ So mueß Er mit der sprach notthalben herauß doch getrost Er sich jmmer seiner Gesellen die anhalten wurden mit der erledigung bej Doctor Fausto / wie auch geschach /

Dann eh der tag anbrach ward der Doctor Faustus schon bey jm / vnnd verzaubert also die Wächter / Das Sie jnn einem harten schlaff lagen / darnach mit seiner kunsst ferner thett Er ketten / thur vnnd Schloss auf bracht den Grafen zeittlich gen Wittemberg / Da dañ dem Doctor Fausto ein stattliche verehrung presentiert wardt/