50

Von der Vierdten Fasnacht
Am Donnerstag:

Die Letste Bacchanalia ward am Donnerstag Da denselben tag ein grosser Schnee gefallen. Doctor Faustus wardt zu den Studenten Berueffen / Die jm ein stattlich Malzeit aushielten /

Da Er wider seine Abentheur anfieng zubrauchen / Dann Er verzaubert Dreyzehen Affen jnn die Stuben / die werckhlich gauggeltñ / Das nie dergleichen gesehen ist worden / Dann Sie sprangen aufeinander / wie man sonnsten die Affen abricht / so namen Sie auch einander jnn die Fueß vnnd Dantzten ein gantzen Reyen vmb den Tisch herumb zum Fenster hinauß vnnd verschwunden also /

Sie satzten Dem Fausto ein bratnen Kalbskopff fur/ Als nun ein student jn erlegen wöllen / hatt der Kopff angefanngen zureden/ vnnd Menschlich zuschreyen Mordio. helffio. O wee was zeichstu mich. Da Sie erschrackhen / Dann widerumb anfieng zulachen / vnnd also den kalbskopff verzerten / vnnd Doctor Faustus noch zeittlich am tag zu hauß gieng mit versprechung widerumb zuerscheinen /

Baldt risst Er jm mit Zauberey einen Schlitten zue / der hatt ein gestalt wie ein Drach / auf dem Haupt sass Doctor Faustus / vnnd mitten die Studenten / so waren Vier zauberische Affen ob dem Schwantz Dess Drachen Die Gauggelten aufeinander gantz lustig zusehen / der ein bließ auf der Schalmej vnnd lieff der Schlitt ahn jm selbst wahin Er wolt / Das ließ er weren biß jnn Mitternacht hinein mit sollichem kleppern Das keiner den Andern hören könndt / vnnd Dunckht doch die Studenten Sie weren jnn Dem Lufft gewandelt.