Ob das Sacrament in der Palm wochen consecriert gebuert es das gantze jar zuhalten? Antwort / das werde in aim rainen Vaß behalten / der Briester so er das dem khranckhen raicht / sol ain wenig wein dartzue thuen.

     Ob sich gebuert ain wasser zu dem wein zuthuen / so man den khranckhen speist? Antwort / Es ist ain wenig gnueg.

     Ob dem khanckhen besessnen oder unsinnigen gebuere das Sacrament zuraichen? Antwort / mit dem Sacrament sollen jre meüller berüert werden.

     Ob dem Briester der sein weib in Khindlpetten hat / gleich als ob aines Layen weib geschicht / die gebet zusprechen gebuere? Antwort / Nain / dan solche gewonhait wirt in Khriechen nit gehalten / Es wär dan das man khain andern Briester gehaben möcht.

     Was ist an des heilligen Creytz tag der erhöhung zuessen? Antwort / Die Münich sollen khain Visch essen / die Layen aber / so das heillig Creytz gekhüsst haben / mügen fleisch essen / es wär den das derselb auff den Mitwoch oder Freytag fielle.

     Ob dem Briester / so die nacht bey seinem weib gelegen / morgens in die Khirchen zugehn gebuert? Er wasche sich zuvor an dem ort under dem Nabl / mag in die Khirchen gehn / und das Evangelium lesen / aber zu dem Altar nit gehn auch nit Meß halten / wil aber der Briester am Sontag und Erichtag meß halten / mag er am Montag bey dem weib ligen / und also fürauß.

     Ob ainem der khain weib hat / das Sacrament geraicht sol werden? Antwort / Soverr er die gantz vasstn mit khainer vermäheltn / oder unvernünfftigem thier zuthuen gehabt hat.

     Ob die Khinder nach der Tauff sollen gespeist werden? Antwort / Im Templ so man die meß oder vesper helt / speist man die.

     Was man für speiß in der grossen vasstn brauchen sol? an Suntagen und Sambstägen Visch / an den andern tägen IKRI / das sein vischrogen / Die Münich essen in der Vasstn hönig / trinckhen KWASS ain geseurts wasser.

     In Segnung der Khuthia / wievil wachsliechter seind antzuzinden? Antwort / Für die seeln zway / für des lebendigen hayl oder glückh dreu.

     KHUTHIA wie macht man die? Antwort / Seind drey thail traid gekhocht / der vierte thail von Arbassen / Panen und Zisern / auch gekhocht / vermacht mit hönig und Zuckher / man mag auch ander frücht / so man die gehaben mag darzü thuen / solche Khuthia gebraucht man in der Khirchen nach volbrachten begenkhnussen.

     Wann die Bulgarn Polowtzj und CZUDI zutauffen sein? Antwort / So die viertzig tag zuvor gefasst haben / und die raine gebet uber sy gesprochen sein / Ob aber ainer nit gesuntwär / nuer acht tag.

     Der das khind taufft / soll die ermelln wol aufstreichen / damit so er das Khind gar in das wasser daucht / nichts am khlaid von der Tauff anhenge / Die geborn hat / sol in viertzig tagen von der geburt in die Khirchen nit gehn.

     Ob dem weib nach gehabtem jrem rechten / das Sacrament zu raichen sey? Antwort / Man sol jers nit geben / sy sey dann zuvor gewaschn.

     Auch ob gepuerdt in das Zimer der Khindlpetterin zu gehn? Antwort / An das ort da die geborn hat / sol in dreyen tagen niemand gehn / zu gleich als andere unsaubere Assach vleissig zu waschn / also sol man dieselb stat oder ort mit gebeten wider rainigen.

     Ob man nach nidergang der Sunnen begraben sol? Antwort / Nach undtergang der Sunnen sol niemand begraben werden / dann das ist der todten Cron die Sunn zusehen ee die begraben werden / Der ist aines grossen verdiensts / welcher der todten painer und die alten pildnussen behellt oder begrebt.

     Ob dem Eheman gebürt das Sacrament zu Osterlichen zeiten zunemen? Ja so verr er die Vasstn bey seim weib nit gelegen ist / Welcher am Ostertag mit seinen zenden ain Ay beruert / oder auß seinem Zandtfleisch pluet khumen ist / sol sich desselben tag vor Communion enthalten.

     Ob dem man gebüert die nechste nacht nach emphahung des Sacraments bey seinem weib zuschlaffen? Antwort / Ime gezimbt nit / Ob sy aber am Freytag / Sambstag oder Suntag ain khind aines pösen thuens geperd das puessen vatter und muetter / wann aber vatter und muetter Edl / und aines grossen namens sein / die geben etliche grifen ainem Briester / der für sy bitte / Wann ain zerrissen papier darauffichtes der heiligen schrifft geschriben / auf die erden felt / ob sich gebüert an derselben stat zugehn? Antwort / Nit.

     Ob sich zimbt ainer Khue die gekhelbert hat / desselben tag millich zu geniessen / Antwort / Nit / dann die ist mit pluet vermischet / aber nach zwayen tagen gebüert es sich.

     Wann ainem sein Geistlich Ambt aufgehebt mag werden? Antwort / Wann ain Briester in der Vassten aines weibs lieb entzündt / und er sein zungen in jrn mund thuet / verschütt vor begierd den samen / sol sich seines ambts ain gantzes jar enthalten / So ainem solches vor dem Briesterthumb bekhummen / sol zu khainem Briester geweicht werden.

     Wann ain solches ainem Layen geschicht / sol dasselb jar das Sacrament nit emphahen.

     Ob ainer zu Briester geweicht sol werden / der auff ain mal bey ainer gelegen ist / und sy geschwengert hat? Antwort / Sy emphahen selten von dem ersten beyschlaff / wann er aber zehen mal bey jr gewest ist / sol nit geweicht werden.

     Welcher ain Jungkhfraw geschwecht hat / oder sein haußfraw im ersten beyschlaff nit hat jungkhfraw gefunden / sol auch zu Briester nit geweicht werden? Der sich von seinem gemahl schaidt / wie püesst der? Antwort / Sol sich ewigclich des Sacraments enthalten / allain in seiner letzten stund nit.

     Ob sich gebürt ainem im leben für seiner Seel sälligkait begengkhnuß zuhalten? Antwort / Es gebür sich.

     Ob ain Khan person für die ander in verrichtung der pueß müge helffen? Antwort / Mag nit / wie brueder für den brueder.

     Ob der Briester den tag als er ain begraben und gekhüsst hat / müge desselben tags sein meß verrichten? Antwort / Sol nit.

     Ob ain Khindlpetterin in verzweiflung jres lebens sol mit dem Sacrament versehen werden Antwort / Soverr die von der stat daran sy geborn hat / getragen ist / und gewaschen wirdt.

     Ob ainem gebüert mit seinem weib an den orten da der heilligen pildnussen sein zu schlaffen? Antwort / So du zu deinem weib gehest / thuestu nit das Creytz vom hals / also auch in der wonung bey den pildnussen / allain die sein dann wol verschlossen oder bedeckht / dann füegt ainem mit seinem weib zu schlaffen.

     Ob es sich gebürdt pald nach dem morgen oder abend essen / ehe du schlaffst in der Khirchen zu betten? Antwort / Welches ist besser schlaffen oder betten.

     Mag der Briester an sein Briesterlichs claid zu dem khranckhen gehn / und jme das Sacrament raichen? Antwort / mag.

     Wie sol man weiber nemen? Antwort / Welcher ain weib nemen will / sol sich viertzig tag oder zum minsten acht tag anderer weiber enthalten.

     Ob ain weib so ain todts khind bringt / püssen sol? Antwort / Das weib so auß trunckhenhait on ander zufel also gepert / Soll püessen / welche das wasser damit sy sich gewaschn / jrem mann umb das er sie lieb haben sol zu trinckhen gibt / sol sechs wochen vasstn.

     Ob man von der Khue das fleisch und milch damit ain mensch zu thuen gehabt prauchen sol? Antwort / all ausserhalb des der solch ubl gethon hat.

     Ob ain weib alter weiber Rhat damit sy emphahen müge / braucht? Antwort / Die weiber so alter Vettln Rat und mit Kreütern hilff suechen / zu emphahen / und nit der Briester / die jnen mit gebeten helffen sollen / sechs wochen püessen / und dem Briester drey Grifn auftzelln.

     Wann ain voller ain schwangere belaidigt / damit sy umb das khind khumbt? Antwort / Ain halb jar sol er püssen / die beseherin auch acht tag von der Khirchen sich enthalten / hintzt sy mit gebeten gerainigt werden.

 

Thauff.

     Also taufft man / So pald das Khind geborn / beruefft man den Briester / der steet vor der thüer darin die Khindlpetterin ligt / spricht etlich benente gebet / setzt dem khind den namen / darnach gemainclich den viertzigisten tag soverr das khind nit schwach ist / wierd gehn Khirchen getragen / und getaufft / und wierd dreymal gar in das wasser gesengkht / one das / würde es nit für getaufft geacht / darnach besalbt mans mit dem Crism / das geweicht oder gesegnet ist / in der Charwochen / wirt auch bestrichen mit Mierrn wie sie sprechen / Die Tauff wirt ainem jegclichen khind besonder gesegnet / und pald nach des khinds tauff geusst mans vor der Khirchen thür auß / Die khinder werden jeder zeit in Khirchen getaufft / es sey dann so gar ferr von der Khirchen / oder die khelten möcht dem khind schaden / und wirt nimmer khain lab wasser allain zu den khranckhen genumen / Die gevatterleut nimbt man nach willen Vatters und Muetter / und also offt sie dem Teufl widersagen / so offt spüertzen sy auf die erden / So schneidt der Pfaff jeder zeit dem khind vom haar und vermacht das in ain wachs / unnd legts etwo an ain sort in der Khirchen / Sy gebrauchen khain saltz noch spaichl mit der erden.

 

Hernach volgt die Bull des Bapst Alexander /
darauß die Tauff der Reussn khlärlich zu vernemen ist.

     Wir Alexander Bischoff Diener der diener Gottes / thuen khundt zu ewiger gedechtnuß.

     Nachdem die hoch weißhait des Göttlichen Raths / welchen die menschlich vernunfft nit khan begreiffen / auß jrer unmeßlichen güte / zu hail des menschlichen geschlechts zu bequemer zeit so sy am pessten waiß / und auß tieffer gehaimnus alweg pflegt etwas anders heerfürzubringen und zu offenbaren / auf das die menschen erkhennen / das sy auß jren verdiensten und khrefften als auß jnen selbst nichts fruchtpers außrichten khünnen / sunder das jr hail und alle gnaden gabe von dem höchsten Gott und vatter der liechter entspringt und heerkhumbt.

     So haben wir warlich nicht on sundere hohe innerliche freidt des hertzens verstanden / das etlich Reussen in dem Hertzogthumb Lithen unnd ander so nach Griechischen gebreuchen und ordnungen leben / Aber sunst den Christlichen glauben bekhennen / als nemlich die so under die Wildener / Kiovier / Lutzerier und Mednitzer Stet und Bisthumb gehören / auch andere örter desselbigen Hertzogthumbs bewonen / durch mit würckhung und erleuchtung des heiligen Geist etliche jrthumen / die sy nach brauch und gewonhait der Khriechen etwan gehalten / gar auß jren gemüettern unnd hertzen geschlagen / sich zu ainigkhait des allgemainen Christlichen glaubens / und der Lateinischen Römischen Khirchen begeben / und derselben loblichen ordnungen nach zu leben begirig und fürnemens sein.

     Dieweil sy aber wie ander Khriechen in der dritten person getaufft sein / und etlich halten das sy von neuen sollen getaufft werden. Dagegen sich die jhenigen / so nach der Griechen ordnungen bißheer gelebt unnd noch leben / als die so vorhin recht getaufft seyen von neuem sich tauffen zu lassen verwidern / Wann wir nun in bedacht unsers tragenden hirten Ambts / des wir uns gleichwol nit wirdig achten / zum höchsten begern alle und jede Schäffll so uns bevolhen sein / zu dem waren und rechten schaffstall Christi zu fürn / damit auß jnen ain hirrt und ain schaffstal werde / und die heilig allgemain Christlich Khirch / nicht ungleiche und ungstaltige und von dem haubt abgesunderte sonder gleichformige glider habe / und wir derhalben zu Gemüt füeren / das weilennd unser Vorfar säliger gedechtnuß / Bapst Eugeniuos der viert in dem Concilto so er zu Florentz gehalten / auf welchem die Griechen und Armenier gewesen sein / so sich aller ding mit der Römischen Khirchen verglichen / gesetzt und geordnet hat / das der form des Sacraments der Tauff sein soll / Nemblich ich tauf dich in dem namen des Vatters / des Suns / und des heiligen Geists / Amen.

     Deßgleichen auch das durch dise wort / Es werde diser Diener Jesu Christi / getaufft in dem namen des Vatters des Suns und des heiligen Geists / oder Es werd mit meinen henden getaufft dise person in dem namen des Vatters / des Suns / und des heiligen Geists / der recht Tauff verpracht wierdt.

     Dieweil die haubt ursach der Tauff darauß sy jr krafft hat / die heilig Dryvaltigkhait ist / aber der Diener der werckhzeug ist / der das eusserlich Sacrament mittailt / und so also das werckh des Khirchendiensts / durch anrueffung der heiligen Dryvaltigkhait ain Sacrament ist / das demnach die widerholung desselben Sacraments / so in der dritten person mitgetailt wierdt / nit von nöten seye.

     Darumb und dieweil wir uns hieruber mit unsern Bruedern wolbedächtlich und ratsamblich entschlossen / So setzen und ordnen wir auß Apostolischem Gwallt / so uns und andern Römischen Bäpsten / von unserm herrn Ihesu Christo durch den heiligen Petrum / welchem und seinen Nachkhummen im Aposilambt / die versehung des Khirchendiensts bevolhen ist / Das alle und yede sollen zugelassen und angenumen werden / so also in der dritten person getaufft sein / und von den Griechischen zu der Lateinischen und heiligen Römischen Khirchen ordnungen sich begeben wellen schlechts on alle widerredt / auch on alle verpindung oder zwangsal / das sy sich widerumb sollen tauffen lassen / ob sy schon des fürsatz wären / sunstn die andern gebreuch und ordnungen / so durch die Orientische Khirchen gehalten werden / wo sy anderst mit khainer Khetzerey befleckht sein / zu halten.

     Doch mit vorgeender widersagung und abschwerung aller jrrsall der Griechischen gebreuch so der Lateinischen Römischen Khirchen / und derselbigen gueten unnd heiligen ordnungen und satzungen widerstreben zuezulassnn sein.

     Wir ersuechen und vermanen auch darauf durch die hertzlich erjnnderung der barmhertzigkhait Gottes alle und yede / so mit jetzt gemelter tauff getaufft sein / und nach den Griechischen gebreuchen leben / das sy von allen jrrthumen die sy bißheer nach der Griechn gebreuchen und ordnungen gehalten / und die der rainen unbefleckhten heiligen allgemainen Lateinischen Römischen Khirchen / und derselben heiligen vätter bewärten satzungen zuwider sein / absteen / und der allgemainen Römischen Khirchen auch jren hailsamen Leeren zu hail jrer seelen / und zu erkantnuß des waaren Gottes / anhengig sein wöllen / und damit jr hailsam fürnemen von niemandts verhindert / werden müge / So gebietten wir hiemit in krafft der heiligen gehorsam dem Erwirdigen Bischoff zu der Wilde unserm Brueder in Christo / oder andere Prelaten oder Geistliche sy seyen des Prediger oder Minorittn ordens gelerte frumme oder andere taugliche personen / denen er es bevelhen wierdet / alle und jede also getauffte personen / und die zu der ainigkhait der Lateinischn Römischen Khirchen zu khumen / und die vorgemelten jrthumen zu verlassen / und abzuschwern willens sein zu der ainigkhait derselben Römischen Khirchen / wann sy die vorberuerten jrrthumben abgeschworn haben annemen und zulassen solln.

     das er durch sich selbs / oder durch ainen andern / Wir geben auch jme und allen so obsteen / denen er hieruber / so offt es not thuet bevelch geben wirdt / volkhumnen freien gwalt und macht in krafft ditz briefs / diejhenigen welche sy obbemelter massen befinden werden / von jren ubertrettungen die sy durch halltung angeregter jrthummen begangen / desgleichen von der Khetzerey so darauß entspringen thuet / und dann auch von dem Pann und andern Geistlichen Censuren und straffen darein sy derhalben gefallen auß Apostolischem gwalt zu entpinden / auch jnen nach gelegenhait jrer verschuldung ain hailsame Pueß aufzulegen / und anders so die notdurfft ervordern wierdt fürzunemen und zu handlen.

     Nachdem aber villeicht diser unser brief an alle und jede ort / da es von nöten beschwärlich hingebracht werden mag.

     So wellen unnd ordnen wir auß Apostolischem gwallt / das desselben glaubwirdige Abschrifft / durch ainen offnen Notari underschriben / und mit gedachts Bischoffs zu der Wilde oder aines andern Bischoffs oder Geistlichen Prelaten Insigl verfertigt / in und ausser gericht / und sunst allenthalben do dieselb Abschrifft fürgepracht oder gezaigt wirdet / eben so wol als disem unserm Original brief / wo der fürkheme volkhumner glauben gegeben werden solle / unverhindert aller Apostolischen satzungen ordnungen und alles anders so hierwider angetzogen werden möchte.

     Derhalben sol khainem menschen gezimen dise unser satzung / erclärung / vermanung / bevelch / gebot / zuelassung / willen und Decret zu verprechen oder fräuenlich darwider zu thuen.

     Wo aber jemandts solches sich understüende / der wisse / das Er in den zorn Gottes und seiner heiligen Apostl Petri und Pauli gefallen seye.

     Geben zu Rom bey Sant Peter den Zwaintzigisten tag des Monats Septembris. Nach Christi unsers herrn geburt Tausent Fünfhundert und Ain Jar / Unsers Bapstumbs im Neundten jare.

 

Von der Peicht.

     Wiiewol sy die Peicht auß dem gesatz haben / so spricht doch der gemain man es sey ain werch / das den Fürsten / auch den Edlen Herrn und ansehlichen Personen zuegehöre / Sy peichten zu den Osterzeiten mit gantzer rew und ehrerpiettung / Der Peichtvatter und der do peicht / steen mitten in der Khirchen / khern baide jre gesicht gegen ainer pildnuß dartzu verordent / Nach der peicht und gegebner pueß naygen sie sich gegen der Pildnuß / und zaichnen sich mit dem Creytz / an khopff / prust / und an baiden achseln / mit den vordern dreyen zusamen gefüegten fingern anrüerundt / und mit grossem erseufftzen sprechen laut / Ihesus Christus Gottes Sun erbarm dich unser /und das ist alles des gemainn mans gebet / Etlichen werden zu pueß vasstn / andern etliche gebet aufgelegt / den Vatter unser khunnen wenig der gemainn leüt / etlicher sünde halben lassen sy die personen waschen / an der heilligen drey Khünig tag / nemen sy ain wasser auß ainem fliessenden pach / und behalten das geweicht durch das gantz jar in der Khirchen zu abwaschung der grossen sünde / Die sünd am Sambstag begangen achten sy für geringer / und geben geringere pueß darüber / Es seind vil geringschätzig uberfarung / darumb sie gen Khirchen nit sollen gehn / doch am Templ durch die thüer oder fenster / die sy gemaingelichen dartzue haben / mügen sy den Gottes dienst hören oder sehen / Welcher bey seinem weib vor mitternacht schlafft mag sich abwaschen / und gen Khirchen gehn / aber nach mitternacht nit.

 

Von emphahung des Sacraments.

     Sy emphahen das Sacrament undter baiderlay gestalt / als sy das gesegen wellen / müschn sy wein und Brot zusamen / So vil sich der Communicantn ansagen / sovil bringt man brot / khlaine laible / und ains für den Priester / die Brot haben oben in der mith ain eingedruckhten modl ainer schrifft / dasselb stuckh schneidt der Briester viereckhet herauß / mit sonderm gebet / legt das auf die Paten das ist für den Briester / Auß den andern Brotn die für die Communicantn sein / sticht an der seitten ain drieckhet stückhl herauß / legt die zu dem andern auf die Paten / zu seiner zeit thuet die alle in Khelch / und dann den wein und wasser dartzue / Wann es nun khumbt zu niessung / hat ain khlains löffele nimbt der Briester sein stuckh damit / und gibt den Communicantn yegclichem ains / alles mit dem löffl / und als offt im jar ainer das thuen will / so er nur peicht / so thuet man jme des stat / sonstn ist auch die gemain zeit desselben zu Ostern gesetzt / Den siben järigen khindern gibt man das auch / dann sy sprechen in denselben jarn mügen sy sünden / So ain khind dermassen schwach ist / damit es das Sacrament nit geniessen mag / lasst man jme ain tröpfl auß dem Khelch in mund / Aber fur die khranckhen im jar macht man das am Antlaß oder gründonnerstag der Kharwochen / und wierdt das gantz jar hinumb behalten / So es dann vonnöten / nimbt man ain khlains stückhl darvon / das erwaickht man wol in wein / und thuet ain wenig labes wasser dartzue / und gibts dem khranckhen / die vermischung Brodts und wein / ehe die verwandlt sein am umbtragen vor der Meß / eheret man als wäre es Sacrament.

 

Von der Priester gebet den Pildtnussen
und Evangely Büechern.

     Khain Münich noch Briester bett sein aufgesetzte tagzeit / Er habe dann ain Pild vor oder bey jme / die er mit sonder grosser eher erpietung in sein hand nimbt oder angreifft / Der aber dieselb uber die gassen tregt / hellt er die in der höche die alle fürgeunde mit emplöstn haubt sich becreytzigen unnd naig und ehrn / Die Evangely Bücher behalten sy an ehrlichen stelln / als ain heillig ding / Sy greiffet / die auch nit an / sie haben sich dann vor gecreytzet / und mit plossem khopff genaig und mit grosser eher erpietung nemen sy die in die hendt.

 

Feyrtäge.

     Die Feyrtag werden durch die ansehenlichere oder reiche nach dem Khirchgang mit Essen / wol trinckhen / und erlichern khlaidern gehalten / Die armen arbaitten wie an andern tägen / sprechen Feyren und sich der arbait enthalten / gehört den Herrn / Burgers und Handtwerchsleut besuechen die Khirchen / darnach arbaitten sy wie zu anderer zeit / vermainen sälliger zu sein arbaitten / dann dem trincken Spyl / oder andern dergleichen obligen / und das jr unnutzlich verthuen / Dem main[en] menschen [u] ist das trinckhen des Mets und Piers verpotten / ausserhalb etlicher bestimbter zeit im jar / als zu den Weichnachten / Faschang / zu den Ostern / Phingsten / unnd etlichen andern bestimbten zeiten / zu den selben tägen feiern sy mehr trinckhens / dann audacht halben.

     Des erstee mals als ich auff mein beger zu Khirchen in das Schloß an unser Frawen schiedung tag gefürt bin worden / hab vil armer Paurn gesehen am schloßgraben arbaitten.

     Der heilligen Dryvaltigkhaittag halten sy am Montag in Phingstfeyrtagen / Am Sontag aber nach Phingsten halten sy aller heiligen tag / Den Gottsleichnambs tag halten sy nit / Wann sy schweren / thuen jren ayd mit khüssung des Creytz / Schelten gemaingclichen nahend wie die Hungern / das dir die hund dein Muetter unrainigen.

 

Vom Purgatorio oder Vorhell.

     Sy halten nichts vom Purgatorio / sonder sagen ainem yegclichem sterbenden sey seiner seel ain stat nach des sterbenden verdienst verordent / den säligen ain liechte mit senfften Engln / denen aber so in ungnaden seind / ain finstere stat mit Engeln die sy mit schreckhen / und in ander weg betrüben / an den orten erwartn die des Juongsten gerichts / Die im liecht mit den senfften Engeln / seind getröst götlicher gnad und bitten täglichen umb das Jüngst gericht / die andern aber das wider spil / und sagen die seel leide on den cörper nit / sey des auch nit schuldig / dann so die baide mitainander gesündiget / wär nit pillich / das ain darumb zu peinigen / das ander rhueen zu lassen / Das sy aber für die seeln opffern und bittn lassen / glauben sy mügen damit den seelen ain mildere stat und ringerung jrer betrübnuß des jüngsten tags zu erwarten / erlangen.

     Mit dem geweichten wasser besprengt sich khainer selbs / nur wann die Briester damit sprengen / nemen sy es an / Sy weihen khain Ertrich zu jrer begrebnuß / sagen / das Erttrich säligt den Leich nit / sonder der Leich das Eritrich.

 

Von Heilligen.

     Sant Nicla so zu Bary im Künigreich Neapolis ligt / den ehren sy für ander und sagen / von villerlay seinen wunderzaichen / undter denen ains. Vor etlich wenig Jarn geschehen sein soldt / Ain Moscovitischer ansehenlicher Khriegsman Michael Chisaletzkhj genant / der hat in ainer schlacht ainen nambhafften Tattern in die flucht bracht / Und als Michael den Tattern nit hat mügen erreiten / Rüfft laut Sant Nicla an / hilff mir den Tattern zu erraichen / Der Tatter erhört das und spricht / Niclas wird mich der mit deiner hilff erlangen / daran thuestu khain wunderzaichen / erledigest du aber mich der dich nit kent / davon wierd dein namen groß / sy sagen des Michael pferdt sei erstanden / und der Tatter jme entgangen / Darauff dan derselb Tatter sein lebenlang Jerlichen ain anzal hönig zu ehrn Sant Niclas dem Michael zugeschickt / armen leuten auszutailn / und dem Michael auch sein thaill hönig / samt ainer herrlichen Marderen schauben verehrt.

 

Die Fasstn.

     Die Fasstn vor Ostern nennen sy die groß Fasstn / und halten die siben gantz wochen / In der ersten brauchen sy auch gemolhens / die nennen sy SZIRNA, als Khäsig / die andern wochen alle essen sy auch (ausser der die uber land raisen) khain visch / so findt man undter jnen / die zu der selben zeit am Suntag und Sambstag essen / die andern täg sich von aller speiß enthalten / Aber ander die am Suntag / Erchtag / Pfintztag und Sambstag allein / und die andern tag auch nichts essen / seindt auch etlich / die am Montag / Mitwoch und Freytag ploß ein stück prot und nit meer nemen.

     Die andern nachvolgunde Vasstn / halten sy nit so streng / und heben an zu fasstn / den Montag nach dem Suntag der hejlligen Drivaltigkhait daran sy aller heiligen tag feyren und vasstn / also hintzt auf Sant Peters und Pauls tag / und wirt Sant Peters vasstn genent.

     Darnach volgt unser frauen Vasstn / Vom ersten tag Augusti / hintzt den tag unser Frauen schiedung / Und wan Sant Peters und Pauls tag oder unser Frauen himelfart auf ein mitwoch oder Freitag fallen / so vasstn sy dieselben tag gleichermassen / jm Advent / vasstn sy sechs gantzer wochen / und wird Sant Philipps vasstn genent / dan nach jrem Calender fellt Sant Philippstag aufden Viertzehenden Novembris / Herwider an khaines heilligen abent vasstn sy / allein Sant Johannes enthaubthung / des feyer sy am Neunundtzweintzigisten tag Augusti halten / Und wan ein namhaffter heiliger tag in die vasstn felt / als Sant Mathias oder unser Frauen verkhündung / an den selben tägen essen sy auch Visch / den Münichen aßer seind vil strengere vasstn aufgelegt / die sich auch mit dem Tranck was benügen müssen lassen / ist ain gemain Wasser / mit ainem taig oder khleibm geseuert.

     Zu derselben zeit / ist auch den Pfaffen der Mett und Pier zu trinckhen verpotten / Wie auch bey jnen alle gesatz und gebot gemachs hingeen / am Sambstag essen sy fleisch dafür enthalten sy sich desselben am Mitwoch.

 

Die Lehrer den sie nachvolgen.

     Basilius der groß / Gregorius / Johannes Chrisostomus / den sy auch mit dem gülden mund nennen / SLATAUSTA, halten khain Prediger / vermainen genueg zu sein / so ir Gotsdienst aller in jrer sprach gehalten wirdet / den sy täglichen von den Briestern in der Khirchen hören / und verstehen / zu dem das sy vermainen / vil jrrthumen und Ketzereyen durch die Predigen entstanden sein / Die offne peicht / Und in khünfftiger wochen / die feyer oder vasst täge verkhünden die Briester am Suntag / Und was der Großfürst glaubt / oder vermaint guet zu sein / dem volgen sy in der gemain.

     Datzumal ist uns vertraulichen antzaigt worden / wie das der Patriarch von Constantinopl / auf des Großfürsten begern ainen Münich Maximilian genant geschickt hat / alle Bücher / Gesetz / und ordnungen den Glauben belangend zu ersehen / jn ain gutte ordnung und rechtn verstand zu bringen.

     So der das gethan / und vil schwärlicher jrrthumen befunden / und für den Fürstn bracht / und jne recht für ain Ketzer achtet / der weder dem Römischen noch Griechischen prauch nach gieng.

     Nach solchem / wiewol der Fürst jne Ehrlich hielte / so ist er doch verschwunden / und wie jr vil achten / sey ertrenckt worden.

     Dreu Jar vor unser ankhunfft / war ain Griechischer Kauffman Marcus genant / von Capha / daselbstn in der Mosqua gewest / und gleichmessige wort geredt / Was gefangen / unangesehen das des Türcken Pot / mit emsigen und scharffen worten für jne gehandlt hat / also hinweg genumen worden / Des Fürsten Inndrester Rat / Schatzmaister / und Cantzler / der klain Georg genant / ain Griech hat dieselb mainung auch gehalten / darumb ist er aller ämbter entsetzt worden / und in ungnad gefallen / gleichwol möchte er der Fürst des nit wol empern / nam den zu gnaden aber in andere ämbter an / dan er war gelert und viller sachen erfarn / Er ist mit des Fürsten Muetter in das Land khumen / wan der Fürst sein bedörfft / und nach jme geschickht / und er zu der stiegen bracht hat etlichen seinen ansehenliche[n] Rätten Bevolhen / jne mit samt dem schlitn darinnen er saß / in sein Zimer zu tragen / Als er aber sich des entsetzte und werte / sich gemachs uber die stiegen auffueren ließ / wie pald das der Fürst vernam / ertzürnt sich sehr / die muesten den denocht hinauf in des Fürsten Zimer tragen / Wan er dan mit jme sein sachen beratschlagt hette / muesst man den wider die stiegen ab tragen.

     Wie ich des andern mals zu dem Fürsten geschickht / fande den selben khlain Georgen nimer.

     Ire geistliche haben grossen vleiß / vil leut zu dem Christenlichen glauben zu bringen / Die Münich und Ainsidl haben ain Zeit vil abgöttereyen mit jren undterweisungen und säligen leben / und mittailung des Gots wort an villen orten zu Cristenlichem glauben bracht / und noch.

     Derselben zeit sein sy in die wüste / und der unglaubigen gegente / als gegen mitternacht und aufgang der Sunnen getzogen / dahin sy nit mit khlainen sorgen / hunger und arbeit halben khumen / und on aller weltlicher belonung hoffnung / sonder allein Got dem herrn vil Seelen zu gewinne und zu rechtem glauben zu bringen / ye mit jrem sterben die Christenlichen lehr bestätigt haben.

     Ain ansehenlich Closter ist der heiligen Drivaltigkhait zwelf meil von der Mosqua gegen nidergang der Sunnen werts / daselbstn sant SERGIUS begraben ligt / wie sy sagen / vil wundertzaichen thuet.

     Darumen dan ain gar grosser zuelauff järlichen des Volckhs ist / der Fürst ist auch ye dahin khumen / und werden al vom Closter gespeist / sy sagen es sey ain kupfferener hafen oder khessl / darinnen man das essen und gemainiglichen das kraut gekhocht / es khumen vil oder wenig leut dahin die werden daraus gespeist / und bleibt jeder zeit sovil uber / damit das dienstvolckh auch jrn thail haben / Also / das nimmer abgeht / auch khain uberfluß uberbeleibt.

     Als hievor gesagt das die Moscovither sich für die rechtn Christn beruemen / Uns aber als die der anfenckhlichen Kirchen / und der alten heiligen satzungen verlassen / verdamen / darumen wann ainer der unsern willig / oder auch wider seines herrn willen mit fürgeben glaubens halben zu jnen khumt / vermainen den auch von seinem herrn ervorderten nit wider zu antworten / des mir auch in ainem sondern zufal zuegestanden ist / den ich nit undterlassen wellen / hie antzutzaichen.

     Ain ansehenlicher Burger zu Cracaw / Michael Meydl / oder Spies genent / als ich zu dem andern mal an die ortverordent was / hat mich uber offtes entschuldigen mit so grossen ersuechen bewegt / ainen jungen Burgers Sun Erasmen Bethman mit mir zu nemen / ist ain wolgestalte Person gewest / auch nit ungelert / und zimlich beredt / aber dem trincken so gar ergeben / das er beweinter gar von der vernunfft geschieden gewest. Darumen ich gedrungen worden / den in die eisen zu schlahen lassen / Uber das begert er sein gelt / das seine Freundt in mein hand geben hetten / damit er was Kauffen möchte / mit dem hat er drey Moscouither und meinen wagen knecht / der ain poll was / bekhumen / und pferdt kaufft / mit denen er sich aines nachts von der Mosqua gemacht / sein weg auf mittag gegen der Stat ASOW genumen / und uber das groß wasser die Occa geschwemt.

     So pald das dem Großfürsten khundt gethon / das der also verriten / Seind die Possten an alle ort denen nach geschickht worden / Die so uber die Occa und TANAIS die flüß khomen / haben denen die der enden der Tattern einfal versehen solln die sachen angetzaigt / die selben haben die gespür oder hueffschleg gesuecht / und antroffen / wie sy den nach geritten / bekumt denen ain paur / von dem sy vernemen / das die Funff flüchtige / den Paurn genötigt / die gelegenhait nach Asow zu weisen / der entran jnen in der nacht.

     Auff das haben die dem hueffschlag nachgeeilt / und bei ainer nacht die fliehende / wie sy sich zu rhue gethon / jr speiß genomen / und jre pferdt an die waid gelassen / bey dem feur ersehen / die nacheillende seind an peuchen hintzue gekrochen / der fliehenden pferdther dan von jnen getriben.

     Mein furman erwacht / und wil die pferdt wider nähener zu jnen khern / Wie der zwischen die im graß verporden lagen / khumen / seind sy urbering auf / und an jne gefallen / gedroet / wo er nit schwige / müste sterben / mit dem wardt er gebunden / und in das graß gelegt / Die pferdt wurden aber weitter hindangetriben / des aber ainer erwacht und ersehen / den nachkhomen / und auch der dritte / der jeglichem wie dem wagen knecht geschach. Dan gingen die nacheillende zu den uberblibnen / Der Erasm was ain behertzender Junger / stellt sich zu wehr / mit plossem Säbl.Als jme die zuesprachen / was er alein thun wolt? So rüfft Erasm dem wagen khnecht.

     Als er vernomen / das der gefangen / darauff er auch sein trost gesetzt / warff den Säbl aus der hand / spricht wölle auch ausser der andern nit frey noch lebendig sein. Sy hetten in zwaien tagen Asow erraichen mügen / jch bin bey den Moscovitern in verdacht gewest / als wäre der auf mein bevelch oder mit meinem wissen also verritten.

     Als die gefangnen wie wir vasst al sachn / darumb wir außgesant verricht / gen MOSAISCO bracht worden / Batte ich die zween mir widerumen zuetzestellen / mit erbietung den uncostn darüber verloffen / zu bezalln / Warde mir zu Antwort / Sich wolte nit gebürn / ainen der umb underweisung rechtes Christliches glaubens zu jnen khäme / zu uberantwortten / Den furman gab man mir on beschwärung. Weil ich vernam das Erasm sich solcher sachen behelffen / und villeicht damit vor merern beschwärnussen entledigen wolte / Sagt ich zu meinem Pristaw oder zuegeordenten / man würd von dem Großfürsten in frembden Landen ubel reden / umb das er den Potschafften jre leut näme / dem aber für zukhumen deuchte mich / der Großfürst liesse den Erasm neben seinen Räten für uns al stellen / und so der solchen sein willen vor unser aller offentlichen erclärte / das er glaubens halben bleiben wolte / möchtn wir al des khundtschfft geben / und der Großfürst würde on nachred / solches beschach / dem sprach ich offentlich darumb zu / Er bekant sich des / darüber sagt ich jme / wirdestu dir wol gepettet haben / so wirdestu umb sovil bas ligen.

     Graff Nugarolis hette ainen Poln undter den seinen / der sprach dem Erasm haimlich zu / vernam das er sich meiner straff besorgte / Fragte ob er aber mit dem Graffen raisen wolte / des er willigte / Der Graff fragt obs nit wider mich wäre / das er mit jme züge / des ich mich erfreite / dan ich besorgte seine Freund möchten gedacht haben / als hette ich villeicht seines gelts halben anders dan sich gebürt gehandlt / der Großfürst bewiligt auch dem Erasm mit dem Graffen zu raysen / also schieden wir von dannen.

     So kumbt niemant in die Mosqua / allein die an andern orten nit wol bleiben thuern / oder die mit worten oder gaben bewegt werden / und die den prauch der enden / nit wissen / Severin Nordwed / der etwan bey Khünig Cristiern in Denmarck Haubtman am Mör gewest / und al sein thuen in Teuffels namen verricht / den ich auch in Denmarckh gesehen / und angesprochen / von dem ich auch vil gehört und vernomen / als sein Künig von grausamer zu Stockholm der haubt stat in Schweden begangener handlungen / vernam die Dennen allenthalben sich zu samblen / sich selbs aus seinem Khünigreich gethon / hat Severin ain befestigung in der Insl Gotland (die etwo zwölff meil lang ist) eingenomen / von dannen freund und veindt beraubt / und das gantz Mör der orten unsicher gemacht.

     Darumb er wüste das jme auch meniglich nach stellen würde / und er khain sicherhait hette / hat sich mit seiner geselschafft erhebt / und zu dem Moscovitter auf etlichen schiffen in dem fluß Narva zu dem Schloß Iwanowgorod khumen von dannen ist er ausser seiner geselschafft / der zeit ich da gewest / in die Mosqua pracht worden / daselbstn er auch wenig nutz gewest / Khaiser Carl hat den durch fürschrifften erlangt / der dan in belegerung Florentz erschossen ist worden.

 

Von Zehenden.

     Wolodimer als er die Tauff emphangen hat / sampt dem Leo Metropoliten von allen sachen Zehend zu geben verordent / von wegen der armen waisn / Khranckhen / alten / frembden / gefangnen / und zu begraben die armen / denen auch zu hilff khumen / die vil khinder und nit zu ernern haben / denen durch Prunst jr guet hingenomen.

     Und in Summa allen armen / damit zu hilff zu khomen / den armen Clöstern und Khirchen zu helffen / allen glaubigen Seelen zu hilff und trost.

 

Wer dem Geistlichen Gericht
underworffen ist.

     Derselb Wolodimer hat auch dem geistlichen gericht undergeben / alle Abbt / Briester / Diaconen / und den gantzen stand der geistlichen / Münich / Nunnen / und die weiber / welche das Brot / darvon das Sacrament gemacht / pachen / das brot heissen sy PROSCURA, Und die waiber welche so alt die jre pluemen nimer haben / praucht man zu desselben brots gebäch / die haist man PROSCURNITZA.

     Item der Briester weiber und Khinder / Artzt / Witwen / Hebamen / auch die so ain Zaichen von ainem heilligen emphangen haben / die so von aines Seel wegen frey gelassen worden / und alle der Clöster und Spital diener / die der Münich khlaider machen / Und was also zwischen denen Personen zangkhs sich erhebt / daruober hat der Bischoff zu richten und zu handlen / Was aber zwischen der ainem und ainer Lay person sich zu etregt / das wiert in gemainem gericht gehandlt.

     Die Bischove handlen auch die Schidungen der so Eheleut und die gemaine beyschlaf halten / So gehörn auch in der Bischove gericht getzwang / wann ain weib jrem Mann nit gehorsam laisst / wan aines in Eebruch oder huererey begriffen wird / welcher sein nahende freundtin Eelich genumen / ob ain Konperson der andern was ubels zu thuen vorgehabt.

     Item die ansprecher / zaubereyen / vergeben / ansprach / von wegen khetzereyen im glauben.

     Wan ain Sun Vatter und Muetter oder seine geschwistrat unmäslichen anfert / darnach auch die wider die Natur handln / Khirchenprüchl / die so die Todten berauben / und die von Pildnussen oder Creutzen was zu jren zaubern nemen / die hund / vögl oder ain ander unrain thier in die Khirchen füerten / oder auch essen / zu dem haben sy gehabt aller sachen massn zu ordnen und zu setzen.

     Hierinn sol sich niemand verwundern / das in diser beschreibung vil widerwärtigs befunden wirdet / dan mit der zeit und an vil orten anders und anders verendert und eingerissen / von gelts und genieß wegen verkhert worden.

     Wan der Fürst den Metropolit zu gasst berüfft / und des Fürsten brüder khainer verhanden / hat jme die oberste stel geben / Wan aber am begengkhnuß gehalten / und den Metropolit und Bischoue geladen / hat der Fürst jnen das essen und trinckhen im anfang als dienend fürgesetzt / darnach ainem brueder oder anderm Fürsten solches von seinet wegen / hintzt zumende zu verrichten bevolhen.

     Damit ich jren Gotsdienst sehen möchte / hab ich an zwaien unser Frauen tagen der schiedung / als ich zu zwaien malln dort gewest bin / erlangt / das ich in die oberste Khirch bin gelassen worden /die Khirchen was hintzt zu der thür in Chor mit esstn von paumen die wol nit gar khlain waren beschütt / in der mitte was ein Pün von zwaien staffeln hoch gesetzt / darauff stunde der Metropolit in seinem hochtzeitlichem khlaid und hütle / het allein den steckhen Possoch in der hand / darauff er sich anleinte / jre Meßgewandt seind wie ain glockhn / an armen wickehln sies auf / damit sie die hend prauchen mügen / seine Diaconi und ander etlich Briester stunden bey jme / und verricht da sein gebet / der Diacon hielt jme die Rholn und er zoche selbs die schrifften an dem pergamen heraus / mitler zeit sang der Chor.

     Der Fürst stund neben der Thür / durch die er in die Khirchen gehet / und laint sich mit dem rukhen an die wendt / und vorn an den stab Possoch / sein huet kholpackh hielt ainer der vor sein stund / also das derselb sein ermel für die hand und finger zohe und steckht die handt gleich als ain stumpf in das hüetl / seine Rätte stunden vasst in mitten der Khirchen an den saillen / daselbstn hin ich auch gestelt ward / nach solchem singen und betten gieng der Metropolit ab der Pün / gegen dem Chor nach der mitte der Khirchen / muesst seine füeß in den langen khlaidern uber die grosse esste hoch heben / dan so haben sy sich im Chor gesamlt / und an der rechten hand durch das klaine thürlein / die briesterschafft Diacon und der Metropolit nach der Khirchen ab / und auf die linckh hand sich gewent / nach der mitte der Khirchen wider auf / durch die grösser thür / die mitten im Chor steet gangen / Eben widersins unsern umbgengen / der ain Diacon trueg die Paten auf dem haubt / darauflag das Brot / so man zu Sacrament machen solt / mit ainem Thüchlein bedeckht / dan ainer den Khelch darin gleichermassen der wein was / so wurden vor getragen etlicher heiltgen pildnussen an thüchern / als Sant Peter / Sant Nicla / Ertzengel etc. Die Briester hetten auch guete zierliche ornaten an / das volckh hat sich vasst andächtiglich ertzaigt / gegen den Pildern / wein und brot / mit seufftzen / wainen / und mit dem hirn an das erdtrich geschlagen / möchtn nit merers gegen Sacrament thuen / Des ich doch nit erfarn / obs ja numals Sacrament gewest / und in gemain al wollaut gesprochen / Herr erbarm dich / Herr erbarm dich / Darnach hat man das hoch ambt angefangen / und wirt aller Gottsdienst in jrer sprach volbracht / vil Khirieleyson und Christeeleyson / doch nuer mit jrer sprach gesungen / Gospodin pomilui / Die Episstl und das Evangelium list man ausserhalb des Chor / an ain emhohen pulpret / laut und verstendig / wan der Briester sein thail geneusst / und die Communicantn speisen wil / So trite der Diacon mit dem Khelch / darin das Sacrament ist / undter die mitter thür des Chor und spricht / Nembt war den Leichnam Christi / und gehet wider hinder sich zu dem Altar / welcher gleich an der thür im Chor steet.

 

Vom Ehestand.

     Welche mans Person umb aines Tochter wierbt / wirt veracht / dan ain Vatter / nimt jme ainen fuor / zu dem er gemainiglich also spricht / Dein wesen und thuen gefelt mir wol / darumb wolt ich dir mein tochter vermäheln / dan so spricht der jung man / Ich wil mich mit meinen freundten derhalben bereden / So dan das zu baiden thailn für guet angesehen wird / handlt man zum beschluß / Und wirt der tag der hochtzeit benent / wo der Preitigan die begert zuvor zu sehen / sagt der vatter / frag ander von denen magstu dich erindern / wie sy ist / wan auch die beredung nit gar wol verfestnet ist / damit der Preitigan gar nit zu ruckh gehn mag / So lasst man jne die Praut nit sehen / hintzt zu der hochzeit und beiligen Zum heirat guet gibt man gemainiglichen Roß / Khlaider / Wehr / Viech / aigne Knecht / und dergleichen.

     Die zu der hochzeit erpetne / vereheren selten oder nimmer gelt / sonder ander gattungen / dieselben last der Preitigan vleissig beschreiben / von wem jegliches gegeben / Nach der hochzeit ersicht er die gaben / ob jchtes wäre das er vermaint zu behalten / dasselb schickht er auf den marckht / lasst dasselb schatzen / die andern gaben schickht er alle jegliches davon es khumen ist / mit danckhsagung / was er aber behallten hat / zalt er in Jars frist / Inhalt der schatzung / oder vergenügt dasselb mit andern gattungen / wo aber ainer sein gab höher achtet / weder der Preitigan die zallung oder vergnuegung thuen wil / so mueß derselb der geschwornen schatzungen sich benügen lassen.

     Vergnuegt aber der Preitigan solche haab in jars frist nit / so ist er solches zwyfach zu vergnügen schuldig / soverr auch der Preitigan solche gab / die geschwornen nit schatzen hat lassen / mueß er die dem gaber nach seinem anschlahen vergnügen / also wirt es in gemain gehalten.

     Den vierten grad der Sipschafft beruerend zu heyraten / gibt man nit zu / das zwen brüder zwo schwestern nemen / achten sy nit zueläslich / Es sol auch khainer seines schwagers schwester nemen / Die geistliche Freundkschafft / als gevätterschafft / lesst man auch nit zusamen heyratten / Welches zum andern mal heyratt / das wird gedult / doch nit so guet / als am ersten / vermainen es sey nit ain rechte Ehe.

     Zum dritten mal wo nit gar groß ursachen verhanden / gedult mans nit.