| |
|
- D a s R o l l w a g e n b ü c h l i n .
V I .
- _____________________________________
- [22]
Von zweyen zenckischen Bauren /
deren einer des Burgemeisters Fraw fragt /
«Sind ir nit auch ein hûr»?
IN einem flecken sassen zwen Bauren / welche nachpauren waren / die lagen einanderen für und für im har / unnd konten nit mit einander ge-‹Bijv›stellen / also daß sy offt den Burgemeister überluffen / welcher ein Unwillen ab inen gewan. Auff ein zeit kommen sy aber für des Burgemeisters hauß / und der ein klopffet ungestúmigklich an. In dem laufft die Fraw hinab und laßt sy eyn. Als sy nun die zwen zenckisch Bauren ersicht / sprichts: «Ir unrúwig leüt sind ir aber vor handen / wie gadts doch zû / daß ir Bauren so an einander kommen mit hadern / fetzen und rauffen / ir sind doch unrúwig leüt?» Antwortet der ein Baur / «Fraw sind ir nit auch ein hûr?» Die Fraw herwider mit scheltworten an Bauren hin / «Du laur / du schelm / darumb mûßt du mir ein stand thûn / ich wil dich desse nit erlassen.» Der Baur antwortet / «So kommen wir Bauren an einander / ich hab euch nur gfragt ob ir ein hûr seyen.»
|
|