BIBLIOTHECA AUGUSTANA

 

Wilhelmine Siefkes

1890 - 1984

 

Dat Ollske un de Bigge

 

um 1930

 

Text:

Wilhelmine Siefkes, Dat Ollske un de Bigge

Animation, Gestaltung und Realisierung:

Armin von Hodenberg und Manfred Haake,

Hanseatische Public Relations Gesellschaft, Bremen

 

______________________________________________________________________________

 

 

 

Dat Ollske un de Bigge

 

Daar was ins maal en Ollske de funn en golden Daler. Daar gung se mit na de Markt hen un köffde d'r en Bigge för. Man de Bigge wull neet na Huus hen gan – of se mutt hum al na Huus hen dragen!

Do gung dat Ollske na de Hund hen un see: Hund, Hund, wullt du de Bigge bieten? Bigge will neet na Huus hen gahn, of ik mutt hum al na Huus hen dragen! Nee! see de Hund.

Daar gung dat Ollske na de Stock hen. Stock, Stock, wullt du de Hund hauen? Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see de Stock.

Do gung dat Ollske na dat Für hen. Für, Für wullt du de Stock brannen? Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see dat Für.

Do gung dat Ollske na dat Water hen. Water, Water, wullt du dat Für utmaken? Für will kien Stock brannen, Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see dat Water.

Do gung dat Ollske na de Osse hen. Osse, Osse, wullt du dat Water drinken? Water will kien Für utmaken, Für will kien Stock brannen, Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see de Osse.

Do gung dat Ollske na dat Tau hen. Tau, Tau, wullt du de Osse binnen? Osse will kien Water drinken, Water will kien Für utmaken, Für will kien Stock brannen, Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see dat Tau.

Do gung dat Ollske na de Muus hen. Muus, Muus, wullt du dat Tau dörnagen? Tau will kien Osse binnen, Osse will kien Water drinken, Water will kien Für utmaken, Für will kien Stock brannen, Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Nee! see de Muus.

Do gung dat Ollske na de Katt hen. Katt, Katt, wullt du de Muus fangen? Muus will kien Tau dörnagen, Tau will kien Osse binnen, Osse will kien Water drinken, Water will kien Für utmaken, Für will kien Stock brannen, Stock will kien Hund hauen, Hund will kien Bigge bieten, Bigge will neet na Huus hen gahn, of ik mutt hum al na Huus hen dragen! Ja! see de Katt.

Un de Katt achter de Muus an, un de Muus achter de Tau, un dat Tau achter de Osse, un de Osse achter de Water, un dat Water achter dat Für, un dat Für achter de Stock, un de Stock achter de Hund, un de Hund achter de Bigge an!

Un „Hupp, hupp, ho!“ De Bigge was in't Stroh!