Γνῶμαι μονόστιχοι

Μονόστιχοι Φʹ

___________________________________________________

799

Φρόνημα λιπαρὸν οὐδαμῶς †ἀναλίσκεται.

800

Φίλον δι᾽ ὀργὴν ἐν κακοῖσι μὴ προδῶις.

801

Φύσιν πονηρὰν μεταβαλεῖν οὐ ῥάιδιον.

802

Φοβοῦ τὸ γῆρας· οὐ γὰρ ἔρχεται μόνον.

803

Φίλος φίλωι γὰρ συμπονῶν αὑτῶι πονεῖ.

804

Φίλων τρόπους γίνωσκε, μὴ μίσει δ᾽ ὅλως.

805

Φίλος με λυπῶν οὐδὲν ἐχθροῦ διαφέρει.

806

Φεῦγ᾽ ἡδονὴν φέρουσαν ὕστερον βλάβην.

807

Φίλων ἔπαινον μᾶλλον ἢ σαυτοῦ λέγε.

808

Φθείρουσιν ἤθη χρήσθ᾽ ὁμιλίαι κακαί.

809

Φιλίας μέγιστος δεσμὸς αἱ τέκνων γοναί.

810

Φίλους ἔχων νόμιζε θησαυροὺς ἔχειν.

811

Φιλόπονος ἴσθι καὶ βίον κτήσηι καλόν.

812

Φεύγειν ἀεὶ δεῖ δεσπότας θυμουμένους.

813

Φέρειν ἀνάγκη θνητὸν ὄντα τὴν τύχην.

814

Φιλεῖ δ᾽ ἑαυτοῦ πλεῖον οὐδεὶς οὐδένα.

815

Φιλίας δικαίας κτῆσις ἀσφαλεστάτη.

816

Φασὶν κακίστους οἱ πονηροὶ τοὺς καλούς.

817

Φίλον βέβαιον ἐν κακοῖσι μὴ φοβοῦ.

818

Φρονοῦντός ἐστι ζημίαν πράιως φέρειν.

819

Φῶς ἐστι τῶι νῶι πρὸς θεὸν βλέπειν ἀεί.

820

Φίλος φίλου δεόμενος οὐκ ἔστιν φίλος.