Προμηθεύς δεσμώτης

Στάσιμος γʹ (887-906)

____________________________________________________________________

Χορός

ἦ σοφὸς ἦ σοφὸς ὃς

πρῶτος ἐν γνώμαι τόδ᾽ ἐβάστασε καὶ γλώσ-

σαι διεμυθολόγησεν,

890

ὡς τὸ κηδεῦσαι καθ᾽ ἑαυτὸν ἀριστεύει μακρῶι,

καὶ μήτε τῶν πλούτωι διαθρυπτομένων

μήτε τῶν γένναι μεγαλυνομένων

ὄντα χερνήταν ἐραστεῦσαι γάμων.

μήποτε μήποτέ μ᾽, ὦ

895

<.......> Μοῖραι, λεχέων Διὸς εὐνά-

τειραν ἴδοισθε πέλουσαν,

μηδὲ πλαθείην γαμέται τινὶ τῶν ἐξ οὐρανοῦ·

ταρβῶ γὰρ ἀστεργάνορα παρθενίαν

εἰσορῶσ᾽ Ἰοῦς ἀμαλαπτομέναν

900

δυσπλάνοις Ἥρας ἀλατείαις πόνων.

ἐμοὶ δ᾽ ὅτε μὲν ὁμαλὸς ὁ γάμος,

ἄφοβος· μηδὲ κρεισσόνων

θεῶν ἔρως ἄφυκτον ὄμμα προσδράκοι με.

905

ἀπόλεμος ὅδε γ᾽ ὁ πόλεμος, ἄπο-

ρα πόριμος, οὐδ᾽ ἔχω τίς ἂν γενοίμαν·

τὰν Διὸς γὰρ οὐχ ὁρῶ μῆτιν ὅπα φύγοιμ᾽ ἄν.