Καθαρμοί

――――――――――――――――――――――――

Προοίμιον

Diog. Laert. VIII 54/62; versus 3: Diod. Sicil. VIII 62 (Diels-Kranz 31, B 112):

ὦ φίλοι, οἳ μέγα ἄστυ κατὰ ξανθοῦ Ἀκράγαντος

ναίετ' ἀν' ἄκρα πόλεος, ἀγαθῶν μελεδήμονες ἔργων,

ξείνων αἰδοῖοι λιμένες κακότητος ἄπειροι,

χαίρετ'· ἐγὼ δ' ὑμῖν θεὸς ἄμβροτος, οὐκέτι θνητός

(5)

πωλεῦμαι μετὰ πᾶσι τετιμένος, ὥσπερ ἔοικα,

ταινίαις τε περίστεπτος στέφεσίν τε θαλείοις·

τοῖσιν δ' εὖτ' ἂν ἵκωμαι ἐς ἄστεα τηλεθάοντα,

ἀνδράσιν ἠδὲ γυναιξί, σεβίζομαι· οἱ δ' ἅμ' ἕπονται

μυρίοι ἐξερέοντες, ὅπηι πρὸς κέρδος ἀταρπός,

(10)

οἱ μὲν μαντοσυνέων κεχρημένοι, οἱ δ' ἐπὶ νούσωι

παντοίων ἐπύθοντο κλύειν εὐηκέα βάξιν

δηρὸν δὴ χαλεποῖσι πεπαρμένοι ‹ἀμφ' ὀδύνηισιν›.

Sext. Emp., Adv. math. I 302 (Diels-Kranz 31, B 113):

ἀλλὰ τί τοῖσδ' ἐπίκειμ' ὡσεὶ μέγα χρῆμά τι ποάσσων,

εἰ θνητῶν περίειμι πολυφθερέων ἀνθρώπων;

Clem. Alex., Strom. V 9,1 (Diels-Kranz 31, B 114):

ὦ φίλοι, οἶδα μὲν οὕνεκ' ἀληθείη πάρα μύθοις,

οὓς ἐγὼ ἐξερέω· μάλα δ' ἀργαλέη ‹ἥ› γε τέτυκται

ἀνδράσι καὶ δύσζηλος ἐπὶ φρένα πίστιος ὁρμή.

Hippol., Haer. VII 31,4 (Diels-Kranz 31, B 131):

εἰ γὰρ ἐφημερίων ἕνεκέν τινος, ἄμβροτε Μοῦσα,

ἡμετέρας μελέτας ‹ἅδε τοι› διὰ φροντίδος ἐλθεῖν,

εὐχομένωι νῦν αὖτε παρίστασο, Καλλιόπεια,

ἀμφὶ θεῶν μακάρων ἀγαθὸν λόγον ἐμφαίνοντι.