BIBLIOTHECA AUGUSTANA

 

Aisopos

floruit ca. 600 a. Chr. n.

 

Μῦθοι Αἰσώπειοι

 

___________________________________________________

 

 

 

205.

Κόραξ καὶ Ἑρμῆς.

(C. 205. B. 287.)

 

Κόραξ ὑπὸ παγίδος κρατηθεὶς, ηὔξατο τῶι Ἀπόλλονι, λιβανωτὸν ἐπιθύσειν ὑπισχνῶν. Σωθεὶς δ᾿ ἐκ τοῦ κινδύνου, τῆς ὑποσχέσεως ἐπελάθετο. Πάλιν δὲ ὑφ᾿ ἑτέρας κρατηθεὶς παγίδος, ἀφεὶς τὸν Ἀπόλλωνα, τῶι Ἑρμῆι ὑπέσχετο θῦσαι. Ὁ δὲ πρὸς αὐτὸν ἔφη· «ὦ κάκιστε, πῶς σοι πιστεύσω, ὃς τὸν πρότερον δεσπότην ἤρνησας καὶ ἀδίκησας;»

Ὅτι οἱ πρὸς τοὺς εὐεργετοῦντας ἀγνώμονες γενόμενοι, ἐν περιστάσει ἐμπεσόντες, οὐχ ἕξουσι βοήθειαν.