Libro de los estados

El segundo libro

___________________________________________________

[Capítulo XLVIII]

[El xlviii° capítulo fabla en cómmo Julio dixo al infante del estado de los deanes, que an en las eglesias catedrales.]

«Sennor infante,» dixo Julio, «en las eglesias catedrales ha un estado que dizen deanes.

Et los deanes tienen [el] mayor lugar que an las eglesias [catedrales] de los obispos ayuso. Et estos an la primera vos de cabillo, tanbién en las exlecçiones commo en todas las otras cosas que sean de aporidar et ordenar por cabillo, tanbién de rendas commo todo lo ál de la eglesia. Et él a de coger et de ordenar todas las cosas en la eglesia et en el coro, et fazer todas las cosas que a la eglesia cunple deyuso del obispo. Et estos deanes pueden meresçer o desmeresçer segund las obras que fizieren et los estados que tienen.»

«Julio,» dixo el infante, «plázeme de lo que me avedes dicho en este estado. Et pues los otros estados de que non me fablastes fasta aquí non son muy grandes, fablatme en ellos diziéndome lo que me cunpliere lo más avreviadamente que pudiéredes.»