Carmina

Carmen XXII

[ad Varum.]

_________________________________________________________

metrum: choliambus

Suffenus iste, Vare, quem probe nosti,

homost venustus et dicax et urbanus,

idemque longe plurimos facit versus.

puto esse ego illi milia aut decem aut plura

5

perscripta, nec sic, ut fit, in palimpseston

relata: cartae regiae, novei libri,

novei umbilici, lora rubra membranae,

derecta plumbo et pumice omnia aequata.

haec cum legas tu, bellus ille et urbanus

10

Suffenus unus caprimulgus aut fossor

rursus videtur: tantum abhorret ac mutat.

hoc quid putemus esse? qui modo scurra

aut si quid hac re scitius videbatur,

idem infaceto est infacetior rure,

15

simul poemata attigit; neque idem umquam

aequest beatus ac poema cum scribit:

tam gaudet in se tamque se ipse miratur.

nimirum idem omnes fallimur, neque est quisquam

quem non in aliqua re videre Suffenum

20

possis. suus cuique attributus est error;

sed non videmus, manticae quod in tergost.