B  I  B  L  I  O  T  H  E  C  A    A  U  G  U  S  T  A  N  A
           
  C. Valerius Catullus
ca. 87 - 54 a. Chr. n.
     
   



C a r m e n  L I

[ad Lesbiam.]

_____________________________________


metrum: Sapphicus


Ille mi par esse deo videtur,
ille, si fas est, superare divos,
qui sedens adversus identidem te
      spectat et audit

5
dulce ridentem, misero quod omnis
eripit sensus mihi: nam simul te,
Lesbia, aspexi, nihil est super mi
      <Lesbia, vocis,>

lingua sed torpet, tenuis sub artus
10
flamma demanat, sonitu suopte
tintinant aures, gemina et teguntur
      lumina nocte. -

otium, Catulle, tibi molestumst:
otio exultas nimiumque gestis:
15
otium et reges prius et beatas
      perdidit urbes.