B  I  B  L  I  O  T  H  E  C  A    A  U  G  U  S  T  A  N  A
           
  C. Valerius Catullus
ca. 87 - 54 a. Chr. n.
     
   



C a r m e n  L X I X

[ad Rufum.]

_____________________________________


metrum: distichon dactylicum


Noli admirari, quare tibi femina nulla,
      Rufe, velit tenerum supposuisse femur,
non si illam rarae labefactes munere vestis
      aut perluciduli deliciis lapidis.
5
laedit te quaedam mala fabula, qua tibi fertur
      valle sub alarum trux habitare caper.
hunc metuunt omnes, neque mirum: nam mala valdest
      bestia, nec quicum bella puella cubet.
quare aut crudelem nasorum interfice pestem,
10
      aut admirari desine cur fugiunt.