Carmina

Carmen CVII

[ad Lesbiam.]

_________________________________________________________

metrum: distichon dactylicum

Si quoi quid cupido | optantique optigit umquam

insperanti, hoc est gratum animo proprie.

quare hoc est gratum nobis quoque, carius auro,

quod te restituis, Lesbia, mi cupido,

5

restituis cupido atque insperanti, ipsa refers te

nobis: o lucem candidiore nota!

quis me uno vivit felicior aut magis hac re

optandam in vita dicere quis poterit?