Carminum liber primus

Carmen VIII

___________________________________________________

Metrum:

Sapphicum alterum

Lydia, dic, per omnis

te deos oro, Sybarin cur properes amando

perdere, cur apricum

oderit campum patiens pulveris atque solis,

5

cur neque militaris

inter aequalis equitet, Gallica nec lupatis

temperet ora frenis?

cur timet flavum Tiberim tangere? cur olivum

sanguine viperino

10

cautius vitat neque iam livida gestat armis

bracchia, saepe disco,

saepe trans finem iaculo nobilis expedito?

quid latet, ut marinae

filium dicunt Thetidis sub lacrimosa Troiae

15

funera, ne virilis

cultus in caedem et Lycias proriperet catervas?