Carminum liber primus

Carmen XXI

___________________________________________________

Metrum:

Asclepiadeum tertium

Dianam tenerae dicite virgines,

intonsum pueri dicite Cynthium,

Latonamque supremo

dilectam penitus Iovi.

5

vos laetam fluviis et nemorum coma,

quaecumque aut gelido prominet Algido

nigris aut Erymanthi

silvis aut viridis Gragi,

vos Tempe totidem tollite laudibus

10

natalemque, mares, Delon Apollinis

insignemque pharetra

fraternaque umerum lyra.

hic bellum lacrimosum, hic miseram famem

pestemque a populo et principe Caesare in

15

Persas atque Britannos

vestra motus aget prece.