| |
|
-
- C a r m i n u m l i b e r t e r t i u s
C a r m e n X V I I
- ___________________________________________
- Metrum:
Alcaicum
Aeli vetusto nobilis ab Lamo —
quando et priores hinc Lamias ferunt
denominatos et nepotum
per memores genus omne fastus
- 5
- auctore ab illo duci<s> originem,
qui Formiarum moenia dicitur
princeps et innantem Maricae
litoribus tenuisse Lirim
late tyrannus —: cras foliis nemus
- 10
- multis et alga litus inutili
demissa tempestas ab Euro
sternet, aquae nisi fallit augur
annosa cornix: dum potes, aridum
conpone lignum: cras genium mero
- 15
- curabis et porco bimenstri
cum famulis operum solutis.
|
|