Carminum liber tertius

Carmen XXVIII

___________________________________________________

Metrum:

Asclepiadeum quartum

Festo quid potius die

Neptuni faciam? prome reconditum,

Lyde, strenua Caecubum

munitaeque adhibe vim sapientiae.

5

inclinare meridiem

sentis et, veluti stet volucris dies,

parcis deripere horreo

cessantem Bibuli consulis amphoram?

nos cantabimus invicem

10

Neptunum et viridis Nereidum comas:

tu curva recines lyra

Latonam et celeris spicula Cynthiae:

summo carmine, quae Cnidon

fulgentisque tenet Cycladas et Paphon

15

iunctis visit oloribus,

dicetur merita Nox quoque nenia.