Adelphoe

C. Sulpici Apollinaris periocha

___________________________________________________

Duos cum haberet Demea adulescentulos,

dat Micioni fratri adoptandum Aeschinum,

sed Ctesiphonem retinet. hunc citharistriae

lepore captum sub duro ac tristi patre

5

frater celabat Aeschinus; famam rei,

amorem in sese transferebat; denique

fidicinam lenoni eripit. vitiaverat

eidem Aeschinus civem Atticam pauperculam

fidemque dederat hanc sibi uxorem fore.

10

Demea iurgare, graviter ferre; mox tamen

ut veritas patefactast, ducit Aeschinus

vitiatam, potitur Ctesipho citharistriam.