B  I  B  L  I  O  T  H  E  C  A    A  U  G  U  S  T  A  N  A
           
  Avianus
floruit ca. 370
     
   


F a b u l a r u m   l i b e r

XXXIII
De ansere ova aurea pariente


_______________________________________________


Anser erat cuidam pretioso germine feta,
      ovaque quae nidis aurea saepe daret.
fixerat hanc volucri legem natura superbae,
      ne liceat pariter munera ferre duo.
5
sed dominus, cupidum +sperans vanesceret+ votum,
      non tulit exosas in sua lucra moras,
grande ratus pretium volucris de morte referre,
      quae tam continuo munere dives erat.
postquam nuda minax egit per viscera ferrum
10
      et vacuam solitis fetibus esse videt,
ingemuit tantae deceptus crimine fraudis;
      nam poenam meritis rettulit inde suis.
sic qui cuncta deos uno male tempore poscunt,
      iustius his etiam vota diurna negant.