BIBLIOTHECA AUGUSTANA

 

Gregorius Magnus

ca. 540 - 604

 

Sacramentarium Gregorianum

 

_________________________________________________________

 

 

 

8.

In natale domini ad sanctum Petrum

 

Concede quaesumus omnipotens deus, ut nos unigeniti tui noua per carnem natiuitas liberet, quos sub peccati iugo uetusta seruitus tenet: per.

Super oblata. Oblata domine munera noua unigeniti tui natiuitate sanctifica nosque a peccatorum nostrorum maculis emunda: per.

Praefatio. Vere dignum et iustum est aequum et salutare [nos tibi semper et ubique gratias agere domine sancte pater omnipotens aeterne deus]: quia per incarnati uerbi mysterium noua mentis nostrae oculis lux tuae claritatis infulsit, ut dum uisibiliter deum cognoscimus, per hunc inuisibilium amore rapiamur: et ideo cum angelis et archangelis cum thronis et dominationibus cumque omni militia caelestis exercitus ymnum gloriae tuae canimus sine fine dicentes Sanctus sanctus sanctus.

Communicantes et diem sacratissimum celebrantes, quo beatae Mariae intemerata uirginitas huic mundo edidit saluatorem: sed et memoriam uenerantes eiusdem gloriose semper uirginis Mariae genetricis dei et domini nostri Jesu Christi, sed et beatorum.

Ad completa. Praesta quaesumus omnipotens deus, ut natus hodie saluator mundi, sicut diuinae nobis generationis est auctor, ita et inmortalitatis sit ipse largitor: