Evangelistarium

fol. 26v-27r

Mt. 17:1-9

____________________________________________________________

Manuscriptum

Sabbato in XII lectionibus

Sequentia sancti evangelii

secundum Matthaeum.

17:1

In illo tempore. Assumpsit Ihesus Petrum, et Iacobum, et Iohannem fratrem eius, et ducit illos in montem excelsum seorsum:

17:2

et transfiguratus est ante eos. Et resplenduit facies eius sicut sol: vestimenta autem eius facta sunt alba sicut nix.

17:3

Et ecce apparuit illis Moyses et Elias cum eo loquentes.

17:4

Respondens autem Petrus, dixit ad Ihesum: Domine, bonum est nos hic esse: si vis, faciamus hic tria tabernacula, tibi unum, Moysi unum, et Eliae unum.

17:5

Adhuc eo loquente, ecce nubes lucida obumbravit eos. Et ecce vox de nube, dicens: Hic est Filius meus dilectus, in quo mihi bene conplacui: ipsum audite.

17:6

Et audientes discipuli ceciderunt in faciem suam, et timuerunt valde.

17:7

Et accessit Ihesus, et tetigit eos: dixitque eis: Surgite, et nolite timere.

17:8

Levantes autem oculos suos, neminem viderunt, nisi solum Ihesum.

17:9

Et descendentibus illis de monte, praecepit eis Ihesus, dicens: Nemini dixeritis visionem, donec Filius hominis a mortuis resurgat.