Evangelistarium

fol. 102r-102v

Mc. 9:16-28

____________________________________________________________

Manuscriptum

Feria IIII mensis VII.

Sequentia sancti evangelii

secundum Marcum.

9:16

In illo tempore. Respondens unus de turba, dixit: Magister, attuli filium meum ad te habentem spiritum mutum:

9:17

qui ubicumque eum adprehenderit, allidit eum et spumat, et stridet dentibus, et arescit: et dixi discipulis tuis ut eiicerent illum, et non potuerunt.

9:18

Qui respondens eis, dicit: O generatio incredula, quamdiu apud vos ero? quamdiu vos patiar? adferte illum ad me.

9:19

Et attulerunt eum. Et cum vidisset illum, statim spiritus conturbavit illum: et elisus in terram, volutabatur spumans.

9:20

Et interrogavit patrem eius: Quantum temporis est ex quo ei hoc accidit? At ille ait: Ab infantia:

9:21

et frequenter eum in ignem, et in aquas misit ut eum perderet: sed si quid potes, adiuva nos, misertus nostri.

9:22

Ihesus autem ait illi: Si potes credere, omnia possibilia sunt credenti.

9:23

Et continuo exclamans pater pueri, cum lacrimis aiebat: Credo, Domine; adiuva incredulitatem meam.

9:24

Et cum videret Ihesus concurrentem turbam, comminatus est spiritui inmundo, dicens illi: Surde et mute spiritus, ego praecipio tibi, exi ab eo: et amplius ne introeas in eum.

9:25

Et exclamans, et multum discerpens eum, exiit ab eo, et factus est sicut mortuus, ita ut multi dicerent: Quia mortuus est.

9:26

Ihesus autem tenens manum eius elevavit eum, et surrexit.

9:27

Et cum introisset in domum, discipuli eius secreto interrogabant eum: Quare nos non potuimus eiicere eum?

9:28

Et dixit illis: Hoc genus in nullo potest exire, nisi in oratione et ieiunio.