BIBLIOTHECA AUGUSTANA

 

Sugerius

1080/81 - 1151

 

Liber de rebus in

administratione sua gestis

 

____________________________________________________________

 

 

 

XXVI.

De dedicatione.

 

Oratorium sancti Romani, ad famulandum Deo sanctisque ejus angelis, dedicari a venerabili viro Rothomagensi archiepiscopo Hugone et aliis quamplurimis episcopis obtinuimus. Qui locus quam secretalis, quam devotus, quam habilis divina celebrantibus, qui ibidem Deo deserviunt, ac si jam in parte dum sacrificant eorum in coelis sit habitatio, cognorunt. Eadem etiam dedicationis celebritate, in inferiori testitudine ecclesia; dedicata sunt hinc et inde duo oratoria, ex una parte sancti Hippoliti sociorumque ejus, et ex altera sancti Nicolai, a venerabilibus viris Manasse [188] Meldensi episcopo et Petro Silvanectensi. Quorum trium una et gloriosa processio, cum per ostium sancti Eustachii egrederetur, ante principales portas transiliens cum ingenti cleri decantantis et populi tripudiantis turba, episcopis praeeuntibus et sanctae insistentibus consecrationi, per singularem atrii portam de antiquo in novum opus transpositam tertio ingrediebantur. Et ad honorem omnipotentis Dei festivo opere completo, cum in superiore parte elaborare accingeremur, aliquantulum fatigatos recreabant; et ne laboris aut penuriae alicujus timore deprimeremur gratantissime sollicitabant.