De diversis artibus libri III

Liber primus

____________________________________________________________

Caput XXIII.

De sellis equestribus

et octoforis.

SELLAS autem equestres et octoforos, id est sellas plicatorias, scabella, caeteraque, quae sculpuntur, et non possunt corio vel panno cooperiri, mox ut raseris ferro, fricabis asperella, sicque bis dealbabis, et cum sicca fuerint, rursum asperella planabis. Posthaec in circino et regula metire, et dispone opus tuum, videlicet imagines aut bestias, vel aves et folia, sive quodcunque pertrahere volueris. Quo facto si decorare volueris opus tuum, auri petulam impones, quam tali modo facies.