De diversis artibus libri III

Liber tertius

____________________________________________________________

Caput LXXXVIII.

Qualiter stagnum solidetur.

PERCUTE in stagno quasi duos cyphos aequales, et conjunge illos in medio, ita ut ora unius in altera procedat, inpositoque illo qui continet cineribus calidis, partem ejusdem stagni, plumbi tercia parte admixta, percute tenuissime, et intercidens particulatim circumpone; adhibitisque modicis carbonibus ignitis, mox ut incaluerit circumunge resinam abietis, et mox ipsas particulas liquescere ac circumfluere videbis. Mox carbonibus amotis, refrigeratum firmum erit. Hoc modo solidari potest quicquid in puro stagno est opus, videlicet, effusoria in ampullis et auriculae, atque ligaturae in quibus opercula pendent, et si aliquid foramen in fusili ampulla per negligentiam contigerit.