B  I  B  L  I  O  T  H  E  C  A    A  U  G  U  S  T  A  N  A
           
  Conradus Celtis
1459 - 1508
     
   



L i b r i   o d a r u m   q u a t t u o r

C o n r a d i   C e l t i s
G e r m a n i   P o e t a e   l a u r e a t i
l i b e r   q u a r t u s   c a r m i n u m .


V Ad Apollinem repertorem poetices, ut ab Italis ad Germanos veniat.

Textus:
Lateinische Gedichte
deutscher Humanisten
ed. Harry C. Schnur
Stuttgart 1966


_______________________________________________

 
Oda V
Ad Apollinem repertorem poetices,
ut ab Italis ad Germanos veniat.

(ed. Schnur)

Phoebe qui blandae citharae repertor,
linque delectos Helicona, Pindum et,
ac veni in nostras vocitatus oras
      carmine grato.

5
Cernis ut laetae properent camenae,
et canant dulces gelido sub axe.
tu veni incultam fidibus canoris
      visere terram.

Barbarus quem olim genuit, vel acer,
10
vel parens hirtus, Latii leporis
nescius, nunc sic duce te docendus
      dicere carmen.

Orpheus qualis cecinit Pelasgis,
quem ferae atroces, agilesque cervi,
15
arboresque altae, nemorum secutae
      plectra moventem.

Tu celer vastum poteras per aequor
laetus a Graecis Latium videre,
invehens musas, voluisti gratas
20
      pandere et artes.

Sic velis nostras rogitamus oras
Italas ceu quondam aditare terras,
barbarus sermo fugiatque, ut atrum
      subruat omne.