Carmina

____________________________________________________________

ci

In Maumethem perfidum

Turchorum regem.

Turche, paras alte subvertere menia Rome,

et Christi legem perdere posse putas.

It Pius at contra, reges capere arma ducesque

ocius hortatur: sunt pia vota Pii.

5

Magne parens, adsis, et nostris annue ceptis;

filius hec suadet sumere bella tuus.

Ipse viam vite docuit, precepta salutis,

que violare nephas, annua sacra dedit.

Hec modo Turchorum rabies auferre laborat,

10

et Maumethes ritibus invigilat.

Non hoc Dardanium genus est, nec sanguine Teucro

ducit avos; Scythica est tetraque barbaries.

Pyrricheos montes et inhospita saxa colebat,

gens ignara Dei, gens inimica tibi.

15

Nunc Asie dominatur agris, Argivaque regna

occupat, Illyriis Pannoniisque minax.

Quaque trahit Martem, divini nominis arces

eruit, et sacras dextruit igne domos

Nulla nove legis, nulla est reverentia prisce,

20

nec Moysi recipit, nec tua verba, Iesu.

Tercius ex alto Maumethes missus Olympo

creditur, et flatu non caruisse tuo.

Sed quenam probitas gentis, que legis honestas?

summa illis laus est abstinuisse mero.

25

In reliquis ventri parent, nec crimina vitant,

pessima, nec vetita est illa vel illa Venus.

Hec hominum vita est, pecudumque, boumve, canumve:

vina vetant; fateor, vina recusat equus.

Adde truces animos gentis, crudelia corda,

30

atque patens rabide pectus avaricie.

Tediaque in nostros, et non sanabile vulnus

invidie; Christi perdere regna parant.

Nos contra intenti validas armare cohortes,

si faveas ceptis, pergimus; affer opem.

35

Hec tua si causa est, tua si victoria, nosque

si cupimus ritus et tua signa sequi;

si tua turba sumus, sacroque cruore redempti:

celestis verbi porrige tela piis.

Parce pio generi, Turchasque involve ruinis,

40

ne frustra tantum gens pia pergat iter.

Ex te pendemus, si vis dabis arma manusque;

pendet ab arbitrio spesque salusque tuo.