De imitatione Christi

Devota exhortatio ad

sacram communionem.

[Liber IV]

____________________________________________________________

INTERROGATIO DE EXERCITIO

ANTE COMMVNIONEM.

VOX DISCIPVLI.

CAPITVLVM  VI.

Cum tuam dignitatem Domine et meam vilitatem penso: valde contremisco et in me ipso confundor. Si enim non accedo, vitam fugio; et si indigne me ingessero: offensam incurro. Quid ergo faciam Deus meus; auxiliator meus et consiliator in necessitatibus? Tu doce me viam rectam; propone breve aliquod exercitium: sacrae communioni congruum. Vtile est enim scire, qualiter scilicet devote ac reverenter tibi praeparare debeam cor meum, ad recipiendum salubriter tuum sacramentum: seu etiam celebrandum tam magnum et divinum sacrificium.