| |
|
- L y r i c o r u m l i b r i
E p i g r a m m a t u m l i b e r
- _____________________________________
- Epigramma IV
Veniat dilectus meus in hortum suum.
Ex Cant. 5
Pulcher Amor sumpsit rudis instrumenta coloni,
Et sua deposuit tela suasque faces:
Et manibus stivam rapuit; castique laboris
Ad sua ruricolas iunxit aratra boves.
- 5
- Ilicet, ut facili subvertit vomere corda,
Castaque virginibus Gratia crevit agris;
«Flos» ait «unus abest: sunt cetera millia florum;
Ut nullus possit, Christe, deesse, veni.»
Epigramma XXXVII
Qualis est dilectus tuus?
Ex Cant. 5
«Qualis erat, tuus ille? tuus pulcherrimus ille?»
Dicebat nuper barbara turba mihi.
Arripio dextra pennam, laevaque tabellam,
Et noto, Christe, tuo quicquid in orbe noto.
- 5
- Pingo rosas, aurum, gemmas, viridaria, silvas,
Arva, lacus, celeri sidera pingo manu;
Et tabulam monstrans, «Noster pulcherrimus» inquam,
«Qualis erat, vultis discere? Talis erat.»
Epigramma XL
Veni de Libano sponsa.
Et fugis, et fugiens clamas, «quid sponsa moraris?»
Non fugis, ut fugias: ut capiare, fugis.
Epigramma XLVIII
Lilia manu praeferenti.
Haec, quae virgineis nituntur lilia culmis,
Unde verecundas explicuere comas?
Non generant similes Paestana rosaria flores,
Nec simili Pharius messe superbit ager:
- 5
- Non haec purpureis mater Corcyra viretis,
Nec parit aequoreis pulsa Carystos aquis.
Cum nullas habeant natales lilia terras,
Quis neget e casta lilia nata manu?
Epigramma LI
Iohanni de Lugo, dum post
morbum ad intermissam
de Poenitentia doctrinam rediret.
Fertur inornatis nuper Metanoea capillis
Flesse, repentina cum raperere febri:
Fertur et indomito frenos laxasse dolori,
Et lacrymis madidos exhibuisse sinus:
- 5
- Cum rursus domito repetis tua pulpita morbo,
Fertur inornatas disposuisse comas:
Et domitos hilari risu frenasse dolores,
Et lacrymis vacuos explicuisse sinus.
Quis, Pater, incolumi de te non gaudeat, ipsae
- 10
- Si gaudent lacrymae, ridet et ipse Dolor?
Epigramma CX
Christi in cruce vox.
Sitio.
«Ah sitio» clamas, Princeps pulcherrime rerum:
Non habeo pro te dulcia vina, siti.
Tu tamen «ah sitio» clamas: dabo pocula, Sponse:
Heu mihi! sed mixto pocula felle dabo.
- 5
- Haec, mi Sponse, bibe: quaeris cui forte propines?
Ad me pro mundi, Christe, salute bibe.
|
|