Vir nemoris

Liber I

___________________________________________________

heu! quotiens circum indignis onerata catenis

et depressa iugo ceruicem sustulit altam

gens tua, fracta licet totidem totidemque recumbens,

ingens alterno se creuit marte nouasque

175

celsior adsumpsit fatis in sanguine uires!

Ac ueluti aeternus proprio de puluere Phoenix,

quem super exstructum ligni bene olentia aceruum

membra iuuat flammis senio confecta cremari,

protrahit alternam totidem post funera uitam.

180

Haud aliter natique tui natique tuorum

perfuncti fatis rerumque ambagibus acti,

uiribus enixi propriis, licet omnium egenis,

Martis opum ignari, duce sanguinis indole auiti,

incertum bellum, nullo ductore, rapaces

[104 ^r]

185

aduersus Ligures, multos gessere per annos.

Sic licet audacis uolucrisque Liguria Galli,

sublimis Aquilae quondam protecta sub alis,

(tantane in immeritos animis regalibus ira?).

fraudibus ereptam rectamque tyrannide terram

190

sanguineo totiens perfudit rore suorum,

perfusamque pudet nunc deseruisse nefande.

Serua spem, surges, coepto aspirate fauentes,

di patrii indigetes. Non haec sine numine diuum.

Namque (fatebor enim longeque arcana mouebo)

195

excidium instabat patriasque tyrannide terras

late inuoluebant pariter cum sanguine Galli.

Cum me defessum, mediaque in nocte cubantem

alta quies pressit placidae simillima morti,

ecce autem insomnis (neque somnia uana uidebam),

200

clara per obscuras ueniens Astraea tenebras

nuda caput, passimque comas incondita, flagrans

luminibus maculisque genas suffusa trementes.

Iam palla auulsa ex humeris comprensaque in orbem

ad latus obliquo lambebat syrmate gressus.

――――――

103^v, 175 fatis T: uac. in V // 104^r, 182 innixi ... egeni T² T³ V // 189 reptamque err. V // 199 peruigil in somnis T² T³ V // 201 comas inculta coniscans T² V comas ... coruscans T³.

[7]