VIII.

[de camelo.]




[contentum propriis sapientem vivere rebus,
  nec cupere alterius fabella nostra monet,
indignata cito ne stet fortuna recursu,
  atque eadem minuat, quae dedit ante, rota.]

5

corporis immensi fertur pecus isse per auras
  et magnum precibus sollicitasse Iovem:
turpe nimis cunctis irridendumque videri,
  insignes geminis cornibus ire boves,
et solum nulla munitum parte camelum,

10

  obiectum cunctis expositumque feris.
Iuppiter arridens postquam sperata negavit,
  insuper et magnae sustulit auris onus.
vive minor merito, cui sors non sufficit, inquit,
  et tua perpetuum, livide, damna geme.