XIX.

[de abiete ac dumis.]


horrentes dumos abies pulcherrima risit,
  cum facerent formae iurgria magna suae.
indignum referens nulllis certamen haberi,
  quos meritis nullus consociaret honor.

5

«nam mihi deductum surgens in nubila corpus
  verticis erectas tollit in astra comas.
puppibus et patulis media cum sede locamur,
  in me suspensos explicat aura sinus.
at tibi deformem quod dant spineta figuram,

10

  despectum cuncti praeteriere viri.»
ille refert «nunc laeta quidem bona sola fateris,
  et frueris nostris imperiosa malis.
sed cum pulchra minax succidet membra securis,
  quam velles spinas tunc habuisse meas.»