invitatio.

magister:

veni, puer! disce sapere.

puer:

quid hoc est sapere?

magister:

omnia quae necessaria: recte intellegere, recte agere, recte eloqui.

puer:

quis me hoc docebit?

magister:

ego, cum Deo.

puer:

quomodo?

magister:

ducam te per omnia, ostendam tibi omnia, nominabo tibi omnia.

puer:

en adsum! duc me, in nomine Dei.

magister:

ante omnia debes discere simplices sonos, ex quibus constat sermo humanus; quos animalia sciunt formare, et tua lingua scit imitari, et tua manus potest pingere. postea ibimus in mundum et spectabimus omnia. alphabetum vivum et vocale habes hic.