Pro ai del chan essenhadors

Texte:

The Songs of Jaufré Rudel

Éd.: Rupert T. Pickens, Toronto 1978

(Rudelian Corpus in MS. C)

____________________________________________________________________________

I

Pro ai del chan essenhadors

En torn mi ez ensenhairitz:

Pratz e vergiers, albres e flors,

Voutas dauzelhs e lays e critz,

5

Per lo dous termini suau,

Qu'en un petit de joy m'estau

Don nulhs deportz no·m pot jauzir

Tan cum solatz d'amor ualen.

II

Las pimpas sian als pastors

10

E als enfans borteitz petitz,

E mias sion tals amors

Don ieu sia jauzens jauzitz,

Qu'ieu la sai bona tot aitan

Ves son amic en greu loguau,

15

Per so suy trop soen marritz

Quar no n'ai so qu'al cor n'aten.

III

Luenh es lo castelhs e la tors

Ont elha jay e sos maritz,

E si per bos cosselladors

20

Cosselhan no suy enantitz,

(Qu'autre cosselhs petit me·n uau,

Aitant n'ay fin talan corau),

Alres no·y a mais del murir

S'alqun joy no n'ai enbreumen.

IV

25

Totz los vezis apel senhors

Del renh on sos ioys fo noyritz,

E crey que·m sia grans honors,

Quar ieu dels plus envilanitz

Cug que sion cortes leyau:

30

Ves l'amor quins el cor me·n clau

Ai bon talant e bon albir,

E say qu'ilh n'a bon escïen.

V

Ma voluntat s[e]·n vay la cors

Nueit e·l dia esclarzitz

35

Laintz per talant de son cors,

Mas tart mi ve e tart mi ditz:

«Amicx, fas elha, gilos brau

An comensat tal batestau

Que sera greus a departir

40

Tro qu'abduy en siam jauzen.»