BIBLIOTHECA AUGUSTANA

 

Mémoire

1378

 

Mémoire sur la visite de

l'empereur Charles IV à Paris

 

Texte:

Heinz Thomas, Ein zeitgenössisches Memorandum

zum Staatsbesuch Kaiser Karls IV. in Paris,

in: Zwischen Saar und Mosel. Festschrift für

Hans-Walter Herrmann zum 65. Geburtstag,

hg. von Wolfgang Haubrichs, Wolfgang Laufer

und Reinhard Schneider (= Veröffentlichungen der

Kommission für Saarländische Landesgeschichte

und Volksforschung 24), Saarbrücken 1995, S. 99-119.

Version digitale: Marie-Luise Heckmann

Illustations: Grandes Chroniques de France (BNF),

enluminées par Jean Fouquet, vers 1455-1460

Texte et traduction allemande (Marie-Luise Heckmann)

 

__________________________________________________

 

 

Le 3 janvier 1378, l'empereur Charles IV, souffrant d'un accès de goutte, arrive à Saint-Denis dans une litière noblement attelée, envoyée par Charles V. Le cortège arrive devant l'abbatiale, à l'entrée de laquelle les moines sont groupés pour accueillir l'empereur et son fils.

 

 

 

Memoire comment l'empereur

entra a Paris, et fu le lundi IIIIe iour de Januier,

l'an sexante dix et sept.

 

1

Premiers que a ce lundi deuant dit se parti le dit empereur de Saint Denis apres sa messe et apres ce qu'il eut beu vn cope et entra en vne litiere, laquelle la royne li auoit enuoie.

2

Item a ycellui iour au matin yssyrent de la ville de Paris de deux mile a XXIIc bourgois de Paris, tous vestus d'un parement, c'est assauoir l'une partie blance de fin drap, et l'autre moitie d'un fin drap sur la couleur d'une sanguine.

3

Item auoient tous ou la plus grant partie barettes vermeilles.

4

Item cheuaucoient par deuant eux bien de cent a VIxx sergens vestu d'une autre liuree non pareille d'icelle et cheuauchierent en belle ordenance et honneste et estoit noble chose a veoir. Et en ycelle ordenance cheuauchierent jusques pres de Saint Denis a l'encontre du dit empereur et illeuc seruirent en belle ordenance. Et apres eux se partirent le duc de Bourgoigne, le duc de Berri, le duc de Bourbon, le duc de Bar, et pluseurs autres barons, de quoi ie ne fais pas mencion, et auoient chascun baron vestu de belles lieureez et honneste.

 

Le 4 janvier 1378, l'empereur Charles IV et son fils Wenceslas

rencontrent, entre Saint-Denis et La Chapelle-Saint-Denis, le prévôt de

Paris, le prévôt des marchands, le chevalier du guet, les échevins et les

bourgeois de la ville de Paris envoyés par le roi à leur rencontre.

 

5

Item quant l' empereur parti de Saint Denis les dis barons retournerent a Paris deuers le roy et les dis bourgois s'enuindrent cheuaucant deuant l'empereur en belle ordenance et vindrent en ycelle ordenance iusques a La Chapelle. Et si tost qu'il orent passe La Chapelle et qu'il porent prendre les champz il se mirent en ordenance en maniere de bataille tout du lonc du chemin bien et par bonne ordenance. L'empereur descendi a La Chapelle de la dicte litiere et monta sur I destrier noir.

 

Charles V partant accueillir l'empereur Charles IV

 

Et les princes qui estoient retourne deuers le roy a Paris retournerent tantost deuers l'empereur, et le roy les sieuy tantost apres et li vint au deuant entre La Chapelle et Paris. Et quant le roy l'encontra il osta son chapel et l'empereur osta son aumuche qu'il auoit sur sa teste, et, quant il orent salue l'un l'autre, il prinrent a cheuauchier, l'un empres l'autre, et ainsi entrerent a Paris, et quant il vinrent a la porte monseigneur Charles de Poitiers et messire Buriau de la Riuiere se mirent tout a pie et menerent l'empereur par le frain jusques au palais; messire Adam de Galonguet et messire Guillaume des Bourdes amenerent le roi en ce parti et par deuant estoit monseigneur de Coucy et pluseurs autres cheualiers qui faisoient vuidier les gens hors de la voie, et l'auoit ainsi le roy ordene affin que on veist plus plainement l'empereur. Apres l'empereur et le roy de France cheuauchoient le roy de Behaigne, le duc de Brabant, tous les freres du roy de France et pluseurs autres princes et barons. Apres venoient, tout de pie, toutes les gens d'armes du roy qui auoient grans bastons en leur main qui ni auoit cheualier si grant qui peuist passer auant, mais que par ordenance, et par ainsi tout le peuple vit paisiblement l'empereur et le roy, et ainsi s'envindrent jusques au palais.

 

Banquet offert en honneur de l'empereur

 

6

Item ce iour ne menga pas l'empereur ne le roy en sale, ne lendemain, mais le roy y dina et tint tous les princes et barons de Behaigne et d'Alemaigne qui estoient auec l'empereur et ausi tous les barons et princes qui estoient pour le tempz a Paris. Et furent seruis du premier mes d'un broet d'Alemaigne, d'un ciue de lieures, pois passez et grosse char; le secont mes: rost de pluseurs manieres, vn broet gaude et vn amande blanc, pastez noirois et tourtes lombardes.

7

Item d'entremes d'une queue de sangler, tiers mes vn rose et vn tieule, oisons et chapons de haute craisse a la dodine, fromentee et venoison, et d'antremes poulles doreez verdes et jaunes et pommes d'orenge. Et fu le diner en vne sale commune et fu assis a la table premier l'euesque de Paris, l'euesque de Bonneseparch, le roy de France et le roy de Behaigne, le duc de Berri, le duc de Bourgoigne, le duc de Sessone, le duc de Bourbon et le duc de Bar.

8

Item ce iour au souper sist le roy en la grant sale du palais a la grant table de marbre et les princes qui auoient dine aueques lui et tous les autres signeurs furent assis chascun selonc leur estat.

9

Item du premier mes: venoison de sangler a la soupe courte, vn broet blanc lie d'oex, vn potage en maniere de sayme de connins et oison de riuiere et vn broet foule sur chapons.

10

Item le secont mes: rost de pluseurs manieres, pastes de conins et de chapons de haute graisse, vn tieulle et vn broet bare de blanc et de vert.

11

Item le tiers mes: crespes verdes et jaunes, tartes cucreez et autre menu ouurage de four, vn broet fin vert et vn broet camelin de petis oiseles, et ni ot point d'antremais. dischnee: nois et poires cucreez et pomes vertes, et mestier de menstrel, et a chascun mes que on seruoit le roi les menestrels aloient deuant les mes, trompetes a grant plante, d'autres menestreux de haus ynstrumens.

12

Item lendemain au diner, le iour de la thiefaine, dina l'empereur en sale. Et fu assis premier l'arceuesque de Rains, l'empereur, le roy de France, le roy de Boeme, l'euesque de Bonneseparch, l'euesque de Paris, et l'euesque de Beauuaix.

13

Item en la seconde table: le duc de Sessone, le dauphin, le duc de Berri, le duc de Brabant, le duc de Bourgoigne, le fil du roy de Nauare, le duc de Bar, le duc Henry du Breil, et le chancelier de l'empereur.

14

Premier mes: poree blanche et pois coulez, oyes saleez et grosse char de pluseur maniere, vn ciue d'oistres et vn broet jorge de char. vne soringue d'anguilles et vne salmine sur chapons. Secont mes: rost de pluseurs manieres de char et bremes rosties et eschiueez de saumon, vn tieule et vn broet fulle, et furent serui de poisson de mer et draue douche a grant plente et de pluseurs manieres, vn broet asure sur le poisson et vn broet jaune sur chapons, anguilles acucreez a la vouee, figues farchies couuers de fueille d'or, et I broet de trois couleurs, blanc, ynde et vermeil et pastez lorrois. Le tiers mes: conins farsis et doreez et haricous et let larde, vn rose et vn broet de verde couleur, tartes cucreez, boureez a la sausse chaude, et vn amande blanc, chappons pelerins a la dodine, tourtes parmeniens, vne espinbeque, vne gellee, espaulles de mouton farcies, et motez de char.

 

Le spectacle

 

 

Retournez.

15

Item d'entremes la maniere comment Godeffroi du Boillon et ses compaignons conquirent Iherusalem, et fut fait vn chasteau grant qui fu amene deuant l'empereur en signifiant la cite de Iherusalem et auoit XXIIII pies de lonc et XII pies de large par dedens en quoi estoient les Sarrazins qui gardoient Iherusalem, et puis y vint vne grant barge en quoi estoit Godeffroi du Boillon et les VII preus ses compaignons et auoit la barge XII engambeez de lonc et tele hauteur que vns homs ne pouoit auenir de sa main au bort, et vindrent arriuer par telle maniere que nule personne s'en peust point appercheuoir empres le chastel qui estoit compare a Iherusalem et lors quant il furent arriue empres le chastel se mirent tout a pie et vindrent assallir la cite, mais anchors traitierent aus Sarrazins comment il vausissent rendre la cite et quant le traictie fut passe lors assalirent moult durement les VII preus le chastel dessus dit qui compare estoit a Iherusalem, et les Sarrazins se deffendirent moult fort et par bonne maniere et trebuchoient par mainte fois des cheualiers Godeffroy a terre jus des crenaus quant il i estoient montez et Godeffroi les rassaloit fort, lui et ses compaignons, et dura l'assaut moult longuement et n'i auoit nule baniere mais que la baniere Godeffroy et les VII preus ses compagnons.