L'Avision de Christine

La première partie

__________________________________________________

III

Comment Christine fut transgloutie

ou corps du dit image

Mon esperit entregette celle part ententif a notter ceste merveille. Adonc laspiracion de laleyne de ycellui grant le tira a soy tant quil cheut es mains de la dame couronnee lors comme elle le eust mis le moulle a tout la matiere en la fournaise mon esperit prent. si les fiche ens et tout en la maniere que aux corps humains donner fourme acoustume avoit tout mesla ensemble et ainsi cuire me laissa par quantite de temps tant qun petit corps humain me fu parfait. Mais comme le voulsist ainsi celle qui la destrempe avoit faitte a la quel cause ce tient et non au moulle iaportay sexe femenin si fus semblablement que les autres soubdainement transgloutie ou ventre de cel ymage / quant ie fus la trebuchee. Adonc present vint la chamberiere de la ditte dame qui buretes tenoit pleines dune liqueur doulce et très souefve de laquelle a abruver doulcement me prist par quel vertu et continuacion mon corps de plus en plus prenoit croissence force et vigueur. Et ycelle sage croissoit et engroissoit la pasture au feur de ma force tant que apar moy porter et paistre mon corps ie pos. ou quel croissoit lentendement qui ia me donnoit cognoiscence de la diversite des entrailles du ventre de lymage par sus les quelles a .ii. pies ie marchoye et estoient faittes de cailloux et dures roches par montaignes et valees bois et metaulx et diversites mainte. mais tant me sembloit longue et lee lespace de la pourprise dycellui corps que lespace de la vie dun homme ne pourrait souffire a toutes cerchier les*diverses contrees qui en lui sont comprises