L'Avision de Christine

La première partie

__________________________________________________

VII

Ci devise la dame couronnee

de son commencement

Ou temps des sus dis larrecins entre les autres fu transportee en ceste contree une vergete yssue de la cosme du susdit arbre dor. Laquelle il planterent en hault vergier en terre fructueuse. ycelle plante parcrut tant que de la beaulte delle ie pris mon nom et fus pellee Libera Apres par multiplicacion de coultivement tant crut*et augmenta tousiours en habondance de dignete ce noble escot que les plantes ja montees et enbelies en leur force couronnerent le .iiime. gitton de leur venue/ et comme le plus auttorisie en firent leur roy. cestui porta fruit de grant dignete. car il sauva ceste terre de maintes enfermetez. Et ainsi pou a pou crut le renom de sa propriete en moultepliant. si en furent peuples maint delittables vergiers par espace de multitude dans en ceste contree. Et ainsi tay conte la premiere racine de mon nom et coultivement/ Et te dis certainement que non obstant qua veue doeil je soye et appere ioenne fresche nouvelle florie et belle que plus de mil ans a ia passez puis le temps de ma premiere naiscence