L'Avision de Christine

La première partie

__________________________________________________

XVII

Du vent de perdicion

qui cuert par la terre

De lanfleure de ceste maladie qui ainsi court parmi ma terre et de lincovenient ou elle tire et quil sen ensuivra recite le prophete daniel ou .iiiie. chapitre lavision que vid iadis lorgueillex roy nabugodonozor il veoit ce dit un arbre qui tant estoit hault grant et esleve que iusques au ciel ataignoit si branchu estoit que ses branches sestendoient de tous les du monde de la grant plante du fruit de cel arbre estoit remplie communement toute mondaine creature en ces branches faisoient leurs nids les oysiaulx de lair/ et desoubz elles se reconcoient les bestes de terre/ et puis veue ceste chose une haulte voix du ciel criant ovoit/ qui commendoit que au lez de terre len couppast ycellui arbre et que tout on le branchast et sen volassent les oysiaulx/ et les bestes *se departissent/ et fust le fruit dispers et perdus

Cestui dit arbre les enflez devant ditz tres poissans qui sont logiez es haulz dongons de ma terre recevent le vent de perdicion/ segnefie les quelx sont de si grant estat force et poissance qua pou cuident attaindre au ciel et tant les rent infetz lenfleure du dit vent que non pas seulement contre les creatures les courages sont gros qui reamplis de desdaing les demonstre mais aussi contre dieu et son esglise/ ce que les branches sestendoient par le monde/ cest que yceulz enflez la force de leur poissance par toutes terres estendent pour la quel force par tout sont redoubtez et cremus/ les oysiaulx si nychoient/ et les bestes si ombroioient cest que lesperituel et le temporel veulent subiuguer gouverner et traire a eulx labondance du fruit de cel arbre/ cest ycelle detestable contagieuse maladie qui communement est en toute gent

Ceste prophecie segnefia la ditte enfermete. mais or entens la diffinicion de sa sentence/ Et lexposicion de la mort Et fin dycelle/ la voix cria du ciel quau lez de terre fust larbre copez et excipez cest que par volente de dieu la force et puissance dyceulz enflez finera et sera retrenchee les degitant de leurs haulteces/ les branches qui seront esmondees et les oisiaulx et bestes qui se partiront. Cest que leur force faillie leurs subgiez et ceuz qui seront pour les cruantes des desdaings de leurs enfleures les craignent et doubtent/ les lairont en leur persecucion/ le fruit qui sera dispars Cest leur semblables menus membres pareillement enflez qui seront humilies Et adonc sera certefie la prophecie de la vierge qui dit. deposuit potentes de sede et exalta* vit humiles