L'Avision de Christine

La première partie

__________________________________________________

XX

Encore de ce mesmes

Ma dame tres redoubtee et digne comme il nappartiegne a la haulteur de vostre force monstrer la tendreur des femmenins corages. laissiez en paix les larmes non propices a vostre constance Et plus avant me dites de ce que touche avez. Cest assavoir la figure ramenteue de sampson le fort laquelle sil vous plaist mexposez/ Et elle a moy. amie comme le temps passe de la destruccion de la fallacieuse et de ses desloyaulx enfans ie aye desire me resiouir en celle attente le te disant

Il est escript ou XVe. chapitre ou livre des Juges disrael comme prophecie et figure du desertement de mon anemie et de ses complices/ que comme sampson lequel est interprete sol fortis. Cest a dire le soleil fort eust long temps par les malices des philisciens en qui ceste fausse regnoit/ este perceutes vint le temps que dieu lui ouvri la voye du reparement de ses adversitez par droituriere vengence. Adonc prist cellui sampxon pluseurs gouplis que on dit renars et ensemble les acoupla par les queues les uns aux autres les lia/ Et comme il fust ia la nuit venue ou premier somme gita ses renars es maisons pleines de fains de ses anemis partie dyceulx renars et les autres chaca es blefs des champs et en leurs boies et en leurs vignes/ et par celle voie sicomme dieu voult furent les filz de la desloiale et elle avec eulx/ en celle partie mors destruis* et ars en leurs pechiez

o amie chiere notes la prophecie du temps de ma gloire

quant ceste desloyalle assez mara chastiee et que dieux vouldra sa punicion cesser et les cris de mes plains seront par pitie devant dieux portez. sicomme iadis furent ceulz des enfans disrael lors que olopheraes a tout sa grant force assigiez les avoit/ Adonc sampxon le fort cest le soleil fort savisera de grant malice contre ses anemis et cessera/ un de mes filz cler comme le soleil fort/ Car le soleil de iustice en lui habitera. Cellui destruira ses anemis par estrange malice Cest assavoir les enfans de la fraudulente anemis de sa vertu qui ma terre et moy par long temps ont persecutee si prendra renars et queue a queue les acouplera/ et entre eulx mettra brandons de feu puis les getera par nuit sus les desloyaulx et en leurs gaignages et tout brusiera/ Et mourront en leurs iniquitez

les renars sont les soubtilz avis de son meismes sens quil prendra que il queue a queue acouplera. Ce sont pluseurs poins par quoy il les prendra en leur malice. Il mettra brandons de feu entre .ii. Cest la punicion de leur menais que par droituriere iustice il leur baillera Il les gittera sur eux quant nuit sera venue/ Et ou premier somme cest quant le terme de leur punicion sera venu et quilz seront endormis en leur perseverance il gittera partie des renars en leur bles et gaignages cest que lavoir mal acquis quilz ont par le sens dycellui sera distribuez es mains des drois heritiers