L'Avision de Christine

La tierce partie

__________________________________________________

VII

Balade

Helas ou donc trouveront reconfort.

pouvres vesves de leurs biens despouilliees.

puis quen france qui seult estre le port.

De leur salu et ou les exillees.

Seulent fouir et les desconseillees.

Mais or ny ont mais amistie.

Les nobles gens nen ont nulle pitie

Aussi nont clers li greigneur ne li mendre.

Ne les princes ne les daignent entendre

Des chevaliers nont elles nesun port.

Par les prelas ne sont bien conseillees

Ne les juges ne les gardent de tort.

Des officiers naroient deux maillees.

De bon respons de poissans traveillees.

Sont en maint cas na la moitie.

Devers les grans naroyent exploitie.

Jamais nul jour ailleurs ont a entendre

e les princes ne les daignent entendre.

Ou pourront mais fuir puis que ressort.

Nont en france la ou leur sont baillees

Esperances vaines conseil de mort

Voies denfer leur sont appareilles

Selles veulent croire voyes broulles.

Et faulx consaulx ou appointie.

Nest de leur fait nul nont si accointie

qui les aide sanz a aucun mal tendre

Ne les princes ne les daignent entendre

Bons et vaillans or soyent esveillees.

Voz grans bontez ou vesves sont taillees.

Davoir mains maulx de cuer haitie.

Secourez les et croiez mon dittie.

car nul ne voy qui vers elles soit tendre.

Ne les princes ne les daignent entendre.

la cause qui me mouvoit e enpersonne oultre mon gre faire tellepoursuitte estoit que quant mon message y envoioye navoit en leur presence nulle audience/ mais a tout le moins quant ie y venoye ramentevoir lestat de moy vesve requerant encline devant eulx par pitie leur secours/ aucune apparence de pitie plus en eulx trouvoie. Cest anuy avec des autres ne me dura pas petit/ ains y fus constant plus de lespace de .vi. ans/sur le pourchas non mie de moult grant somme qui par parties en tieulx travaulx et requestes de seigneurs reserve la reste qui encore mest deu je fus payee.