BIBLIOTHECA AUGUSTANA

 

La Danse Macabre

1485

 

La Danse Macabre

 

Tableau VI

 

______________________________________________________________________________

 

 

 

 

 

Le mort.

Patriarche pour basse chiere

Vous ne povez estre quitte

Vostre double crois quaves chiere

Ung aultre aura / cest equite.

Ne pensez plus a dignite

Ja ne seres pape de rome.

Pour rendre compte este cite

Folle esperance decoit lomme.

 

 

Le patriarche.

Je vois bien que mondain hōneur

Ma deceu / pour dire le voir

Car mes ioye atornent en doleur

Et que vault tant donneur avoir

Trop hault monter nest pas savoir

Haulx estas gaitent gens sans nombre

Mais peu le veulent parcevoir

A hault monter le faiz encombre.

 

Le mort.

Cest de mō droit que ie vous mainne

A la dance / gent connestable

Les plus fors come charlemaigne

Mort prent / cest chose veritable.

Rien ny vault chiere espoventable

Ne forte armeure en cest assault

Dun cop iabas le plus estable.

Rien nest darmes quant mort assault.

 

 

Le cōnestable.

Javoye encor intencion

Dassaillir chasteau / forteresse

Et mener a subiection

En aquerant honneur / richesse.

Mais ie voy que toute proesse

Mort met a bas / cest grant despit.

Tout lui est ung / doulceur rudesse

Contre la mort na nul respit.