BIBLIOTHECA AUGUSTANA

 

Les contenances de table

ca. 1450

 

Les contenances de table

 

Poème II

 

__________________________________________________

 

 

 

Se tu veulz estre bien courtois,

Gardes ces reigles en francois.

 

Assès souvent tes ongles roingne,

4

Longs ongles font venir la roingne.

 

De tes ongles oste l'ordure,

Les avoir ors est grant laidure.

 

Lave tes mains devant disner.

8

Et aussy quant vouldras soupper.

 

Aincois fais benedicite

Que prennes ta nécessité.

 

Seoir te peulz sans contredit

12

Au lieu ou l'oste ce te dit.

 

De pain, de vin, tu dois peu prendre

S'autre vïande doibs actendre.

 

Le morsel mis hors de ta bouche

16

A ton vaissel plus ne le touche.

 

Ton morsel ne touche a salière,

Car ce n'est pas belle manière.

 

Boy sobrement a toute feste,

20

A ce que n'affolles ta teste.

 

Entre boire et ton vin tenir

Ne veulles long plait maintenir.

 

Se tu fais souppes en ton verre,

24

Boy le vin ou le gette a terre.

 

Ne boy pas la bouche baveuse,

Car la costume en est honteuse.

 

Se tu te veulx faire valoir,

28

Sobre parler tu dois avoir.

 

Il est conseillé en la Bible

Entre les gens estre paisible.

 

Ne parles point la bouche pleine,

32

Car c'est laide chose et vileine.

 

Après moustre toy liez tous diz ;

Ne habunde trop en vains dits.

 

S'on oste le plat devant toy,

36

N'en faiz compte et t'en tais coy.

 

De ta touaille ne faiz corde,

Honnesteté ne s'y accorde.

 

En plain disner ou en la fin,

40

N'efforce l'oste de son vin.

 

Et ne rempliz pas si ta pance

Qu'en toy n'ait belle contenance.

 

Ne faiz pas ton morsel conduire

44

A ton coustel qui te peult nuyre.

 

S'entour toy a de gens grans roucte,

Garde que ton ventre ne roupte.

 

Regarde a la table et escoute,

48

Et ne te tiens pas sur ton coulte.

 

Ne touche ton nez a main nue

Dont ta viande est tenue.

 

Ne torche de nappe tes dens

52

Et si ne la mes point dedens.

 

Ne offre a nully, se tu es saige,

Le demourant de ton potaige.

 

Tiens devant toy le tablier net ;

56

En ung vaissel ton relief met.

 

Tiens toy nettement et regarde

Comment a toy chacun prent garde.

 

Ne mouche hault ton nez a table,

60

Car c'est ung fait peu aggreable.

 

Ne frotte tes mains ne tes bras

L'un a l'autre, ne a tes draps.

 

Oultre la table ne crache point ;

64

Je te diz que c'est ung lait point.

 

Ne furge tes dens de la pointe

De ton coustel, je le t'apointe.

 

Se on met lettres en ta main,

68

Mes les tantost dedens ton sein.

 

Garde toy bien de conseiller

A table, ne de sommeiller.

 

Se tu es servy de frournage,

72

Si en prens pou, non a oultraige

 

Et se tu es servy de nois,

N'en mengeüe que deux ou troys.

 

S'on sert de fruit devant lever,

76

N'en mengeue point sans le laver.

 

Quant ta bouche tu laveras,

Ou bacin point ne cracheras.

 

Quant tu rendras grâces a Dieu,

80

Sy te tiens en ton propre lieu.

 

N'oublie pas les trespassez

Qui de ce monde sont passez.

 

A ton hoste dois mercy rendre,

84

De t'en aler dois congié prendre.

 

Se on te fait boire après grâces,

Soit en hanap, ou verre, ou tasses,

 

Laisse premier boire ton hoste

88

Et boy après quant on lui oste.

 

Après peulx dire a haulte voix :

A Dieu vous commans, je m'en vois.

 

Qui a ces ditz bien pensera,

92

A table plus saige en sera.

 

De seoir a table n'est digne

Qui d'aucun bien ne porte signe.