Ballade au nom de la Fortune

(Problème)

1462

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Problème

Fortune fus par clers jadis nommee,

Que toy, François, crie et nomme murtriere,

Qui n'es homme d'aucune renommee.

Meilleur que toy fais user en plastriere.

Par povreté, et fouÿr en carriere;

6

S'a honte vis, te dois tu doncques plaindre?

Tu n'es pas seul; si ne te dois complaindre.

Regarde et voy de mes fais de jadis,

Mains vaillans homs par moy mors et roidis;

Et n'es, ce sçais, envers eulx ung souillon.

Appaise toy, et mets fin en tes dis.

12

Par mon conseil prens tout en gré, Villon!

Contre grans roys me suis bien anymee,

Le temps qui est passé ça en arriere:

Priam occis et toute son armee,

Ne luy valut tour, dongon, ne barriere;

Et Hannibal demoura il derriere?

18

En Cartage par Mort le feis attaindre;

Et Scypion l'Affriquain feis estaindre;

Jules Cesar au senat je vendis;

En Egipte Pompee je perdis;

En mer noyé Jason en ung bouillon;

Et une fois Romme et Rommains ardis.

24

Par mon conseil prens tout en gré, Villon!

Alixandre, qui tant feist de hemee,

Qui voulut veoir l'estoille pouciniere,

Sa personne par moy fut envlimee;

Alphasar roy, en champ, sur sa baniere

Rué jus mort, cela est ma maniere.

30

. . . . . . . . . . . . . . . . . . . . . . . . . . . . . . . . . .

. . . . . . . . . . . . . . . . . . . . . . . . . . . . . . . . . .

Holofernes l'ydolastre mauldis,

Qu'occist Judith (et dormoit entandis!)

De son poignart, dedens son pavillon;

Absalon, quoy? en fuyant le pendis.

36

Par mon conseil prens tout en gré, Villon!

Pour ce, François, escoute que te dis:

Se riens peusse sans Dieu de paradis,

A toy n'autre ne demourroit haillon,

Car, pour ung mal, lors j'en feroye dix.

Par mon conseil prens tout en gré, Villon!