Tristrant

Rivalin und Blankeflur,

Tristrants Geburt

(47 - 102)

_________________________________________________________________________________________

Vornemet recht als ich ûch sage

beide von vroude und von clage

einer rede daz nî kein man

50

bezzerer rede nî gewan

von werltlîchin sinnen,

von manheit und von minnen:

ir sult sie merkin deste baz.

ein koning hie bevorn saz

55

zu Kornevâlis der hîz Marke,

der orlôgete starke

wider einen koning hêre,

man saget daz er wêre

gewaldig zû Îberne,

60

her hête gehat hulfe gerne.

Marke der koning des besande

in mancheme lande

die um in wâren gelegen

manchin tûren * degin.

65

die quâmen ime zu helfe,

wen jener vûr mit gelfe

und hâte ein mehtigez her,

und sûchte in dicke obir mer,

und tet im schaden grôzen

70

mit sînen vechtgenôzen.

daz vornam ein koning rîche.

der quam ouch ritterlîche

mit einer strîtbêren schar

zu Tintanjôl zû gevarn:

75

der was Rivalîn genant,

Lohnois hîz des hêren lant.

der hôrte sagin mêre,

daz dem koninge wêre

geschadet an manegen enden.

80

dar begunde er wenden

und dînte im offinbâre,

recht als her sîn man wâre.

daz wart umme daz getân,

daz her gerne wolde hân

85

sîn swestir ze einem wîbe.

mit pîne an sînem lîbe

irwarp he daz he sie beslîf.

der wart he alsô rechte lîf,

dô daz orlôge ein ende nam,

90

daz die vrauwe wol getân

mit dem hêren enweg vûr.

sie was geheizzin Blankeflûr.

die selbe vrauwe swanger wart,

eir sie sich hûbin ûf die vart.

95

dô sie quâmen ûf den sê,

dô wart ir alsô rechte wê,

daz sie nemen muste den tôd:

von dem kinde quam ir die nôt.

dô sneit man deme wîbe

100

einen son ûz irem lîbe,

den vûrte der koning in sîn lant,

und wart geheizzen Tristrant.