Gregorius

1186/90

Textgrundlage:

Hartmann von Aue, Gregorius,

Hrsg.: Friedrich Neumann,

Wiesbaden: F. A. Brockhaus 1958

______________________________________________________________________________

Auswahl:

1 - 176

231 - 272

719 - 788

871 - 964

1155 - 1200

2605 - 2786

3936 - Schluß

______________________________________________________________________________

Mîn herze hât betwungen

dicke mîne zungen,

daz si des vil gesprochen hât

daz nâch der werlde lône stât:

5

daz rieten im diu tumben jâr.

nû weiz ich daz wol vür wâr:

swer durch des helleschergen rât

den trôst ze sîner jugent hât

dáz er dar ûf sündet,

10

als in diu jugent schündet,

daz er gedenket dar an:

«dû bist noch ein junger man,

aller dîner missetât

der wirt noch vil guot rât:

15

dû gebüezest si in dem alter wol»,

der gedenket anders denne er sol.

er wirt es lîhte entsetzet,

wande in des willen letzet

diu êhafte nôt,

20

sô der bitterlîche tôt

den vürgedanc richet

und im daz alter brichet

mit einem snellen ende.

der gnâden ellende

25

hât danne den bœsern teil erkorn.

und wære áber er geborn

von Adâme mit Abêle

und solde im sîn sêle

weren âne sünden slac

30

unz an den jungesten tac

sô hæte er nîht ze vil gegeben

umbe daz êwige leben

daz anegenges niht enhât

und ouch niemer zegât.

35

Durch daz wære ich gerne bereit

ze sprechenne die wârheit

daz gotes wille wære

und daz diu grôze swære

der süntlîchen bürde

40

ein Teil ringer würde

die ich durch mine müezekeit

ûf mich mit worten hân geleit.

wan dâ enzwîfel ich niht an:

als uns got an einem man

45

erzeiget und bewæret hât,

sô enwart nie mannes missetât

ze dirre werlde sô grôz,

er enwerde ir ledic unde blôz,

ob si in von herzen riuwet

50

und sî niht wider niuwet.

Von dém ich iu nû sagen wil:

des schulde was grôz unde vil

daz si vil starc ze hœrenne ist,

wan daz man sî durch einen list

55

niht verswîgen getar:

daz dâ bî neme war

älliu sündigiu diet

die der tiuvel verriet

ûf den wec der helle,

60

ob ir deheiner welle

diu gotes kint mêren

und selbe wider kêren

ûf der sælden strâze,

daz er den zwîvel lâze

65

der manigen versenket

swer sich bedenket

houbethafter missetât

der er vil lîhte manige hât

sô tuot er wider dem gebote,

70

und verzwîfelt er an gote

daz er sîn niht enruoche

ob er genâde suoche,

und entriuwet niemer wider komen:

sô hât der zwîfel im benommen

75

den wuocher der riuwe.

daz ist diu wâre triuwe

die er ze gote solde hân:

buoze nâch bîhte bestân.

wan diu vil bitter süeze

80

twinget sîne vüeze

ûf den gemächlîchern wec:

der enhât stein noch stec,

mos gebirge noch walt,

der enhât ze heiz noch ze kalt.

85

man vert in âne des lîbes nôt

und leitet ûf den êwigen tôt.

sô ist der sælden strâze

in eteslîcher mâze

beide rûch und enge.

90

die muoz man ir lenge

wallen unde klimmen,

waten unde swimmen,

unz daz si hin leitet

dâ si sich wol breitet

95

ûz disem ellende

an ein vil süeze ende.

Den selben wec geriet ein man:

zer rehten zît er entran

uz der mordære gewalt.

100

er was komen in ir gehalt,

dâ hâten sî in nider geslagen

und im vrevellîche entragen

aller sîner sinne kleit

und hâten in an geleit

105

vil marterlîche wunden.

ez was zuo den stunden

sîner sêle armuot vil grôz.

sus liezen sî in sinne blôz

unde halp tôt ligen.

110

dô enhâte im got niht verzigen

sîner gewonlîcher erbarmekeit

unde sande im disiu zwei kleit:

gedingen unde vorhte,

diu got selbe worhte

115

daz si im ein schirm wæren

und allen sündæren:

vorhte daz er ersturbe,

gedinge daz er iht verdurbe.

vorhte liez in dâ niht ligen.

120

doch wære er wider gesigen,

wan daz in der gedinge

machete alsô ringe

daz er doch weibende saz:

dar zuo sô starcte in baz

125

diu geistlîche triuwe

gemischet mit der riuwe.

si tâten im vil guotes

und ervurpten in des bluotes.

si guzzen im in die wunden sîn

130

beidiu öl unde wîn.

diu salbe ist linde und tuot doch wê,

daz öl diu gnâde, der wîn diu ê,

die der sündære haben muoz:

sô wirt im siechtuomes buoz.

135

alsus huop in bî sîner hant

diu gotes gnâde als sî in vant

ûf ir miltez ahselbein

und trouc in durch beruochen hein.

dâ wurden im verbunden

140

sîne verchwunden

daz er âne mâsen genas

und sît ein wârer kemphe was,

der eine über al die kristenheit.

Noch enhân ich iu niht geseit,

145

welh die wunden sint gewesen

der er sô kûme ist genesen,

wie er die wunden emphie

und wie ez sît im ergie

âne den êwigen tôt.

150

des ist ze hœrenne nôt

und ze merkenne in allen

die da sint vervallen

under bercswæren schulden:

ob er ze gotes hulden

155

dannoch wider gâhet,

daz in got gerne emphâhet.

wan sîner gnâden ist sô vil

daz er des niene wil

und ez gar verboten hât

160

daz man dúrch deheine missetât

an im iht zwîvelhaft bestê.

ez enist dehein sünde mê,

man enwerde ir mit der riuwe

ledic unde niuwe,

165

schœne unde reine,

niuwan der zwîfel eine:

der ist ein mortgalle

ze dem êwigen valle

den nieman mac gesüezen

170

noch wider got gebüezen.

Der dise rede berihte,

in tiusche getihte,

daz was von Ouwe Hartman.

hie hebent sich von êrste an

175

diu seltsænen mære

von dem guoten sündære.

[...]

Als er diu kint weinen sach,

ze sînem sun er dô sprach:

«sun, war umbe weinest dû?

jâ gevellet dir nû

235

mîn lant und michel êre.

jâ vürhte ich harte sêre

dîner schœnen swester.

des ist mîn jâmer vester

und beginnez nû ze spâte klagen

240

daz ich bî allen mînen tagen

ir dinc niht baz geschaffet hân:

daz ist unväterlich getân.»

er nam si beidiu bî der hant,

er sprach: «sun, nû wis gemant

245

daz dû behaltest mêre

die jungisten lêre

die dir dîn vater tæte.

wis getriuwe, wis stæte,

wis milte, wis diemüete,

250

wis vrevele mit güete,

wis dîner zuht wol behuot,

den herren starc, den armen guot.

die dînen solt dû êren,

die vremeden zuo dir kêren.

255

wis den wîsen gerne bî,

vliuch den tumben swâ er sî.

vor allen dingen minne got,

rihte wol durch sîn gebot.

ich bevilhe dir die sêle mîn

260

und diz kint, die swester dîn,

daz dû dich wol an ir bewarst

und ir bruoderlîchen mite varst:

sô geschiht iu beiden wol.

got dem ich erbarmen sol

265

der geruoche iuwer beider phlegen.»

hie mite was ouch im gelegen

diu sprâche und des herzen kraft

und schiet sich diu geselleschaft,

beidiu sêle unde lîp.

270

hie weinten man unde wîp.

ein solhe bivilde er nam,

sô ez landes herren wol gezam.

[...]

Ein tavel wart getragen dar

720

der vrouwen diu daz kint gebar

diu vil guot helfenbein was,

gezieret wol, als ich ez las,

von golde und von gesteine,

daz ich nie deheine

725

alsô guote gewan.

dâ schreip diu muoter an

sô si meiste mahte

von des kindes ahte:

wan sie hâte des gedingen

730

daz ez got solde bringen

den liuten ze handen

die got an im erkanden.

dar an stuont geschriben sô:

ez wære von gebürte hô,

735

unde diu ez gebære,

daz diu sîn base wære

sîn vater wære sîn œhein.

ez wære, ze helne daz mein,

versendet ûfe den sê.

740

dar an schreip si noch me.

daz manz toufen solde

und ziehen mit dem golde,

und ob sîn vindære

alsô kristen wære,

745

daz er im den schatz mêrte

und ez ouch diu buoch lêrte,

sîn tavel im behielte

und im der schrift wielte,

würde ez iemer ze man,

750

daz er læse dar an

álle disse geschiht.

sô überhüebe er sich niht,

unde würde er alsô guot

daz er ze gote sînen muot

755

wenden begunde,

sô buozte er zaller stunde

durch sîner triuwen rât

sînes vater missetât,

und daz er ouch der gedæhte

760

diu in zer werlte bræhte.

des wære in beiden nôt

vür den êwigen tôt,

im wart dâ niht benant

weder liute noch lant,

765

geburt noch sin heimuot:

daz was ouch in ze helne guot.

Dô der brief was gereit,

dô wart diu tavele geleit

zuo im in daz kleine vaz.

770

dô besluzzen si daz

mit solher gewarheit

daz deheiner slahte leit

geschæhe dem kinde

von regen noch von winde

775

noch von der ünden vreise

ûf der wazzerreise

ze zwein tagen oder ze drin.

alsus truogen sî ez hin

bî der naht zuo dem sê:

780

vor dem tage enmohten si ê.

da vunden si eine barke

ledige unde starke:

dâ leiten si mit jâmer an

disen kleinen schefman.

785

dô sande im der süeze Krist

der bezzer danne genædic ist

den vil rehten wunschwint:

si stiezen an, hin vlôz daz kint.

[...]

Si hete zuo ir minne erwelt

weizgot einen starken helt,

den aller tiuristen man

der ie mannes namen gewan.

875

vor dem zierte sî ir lîp

als ein minnendez wîp

ûf einen biderben man sol

dem si gerne behagete wol.

swie vaste ez sî wider dem site

880

daz dehein wîp mannes bite,

sô lác si im dóch allez an,

sô sî des state gewan:

mit dem herzen zaller stunde,

unde ouch mit dem munde:

885

ich meine den gnædigen got.

sît daz ir des tiuvels spot

sîne hulde hete entworht,

daz hete si sô sêre ervorht

daz si vreude und gemach

890

durch sîne hulde versprach

sô daz si naht unde tac

solher unmuoze phlac

diu dem lîbe unsanfte tete.

beide mit wachen unde mit gebete,

895

mit almuosen und mit vasten

enlie si den lîp nie gerasten.

diu wâre riuwe was dâ bî,

diu aller sünden machet vrî.

Nû was ir ein herre

900

gesezzen unverre,

des namen vil wol ir gelîch,

beidiu edel unde rîch:

der leite sînen vlîz dar an

daz si in næme ze man.

905

und dô er sîn reht getete

mit boteschefte und mit bete,

als er ez versuochen solde

und sî sîn niene wolde,

nû wânde er si gewinnen sô:

910

mit urliuge und mit drô

sô bestuont er sî zehant

unde wuoste ir daz lant.

er gewan ir abe die besten

stete und die vesten,

915

unz er sî gar vertreip,

daz ir niht mê beleip

niuwan eine ir houbetstat.

diu was ouch alsô besat

mit tegelîcher huote,

920

ez enwelle got der guote

mit sînen gnâden understân,

si muoz ouch die verlorn hân.

Nû lâzen dise rede hie,

und sagen iu wie ez ergie

925

dirre vrouwen kinde,

daz die wilden winde

wurfen swar in got gebôt,

in daz leben oder in den tôt.

unser herre got der guote

930

underwánt sich sîn ze huote,

von des genâden Jônas

oúch in dem mere genas,

der drîe tage und drîe naht

mit dem wâge was bedaht

935

in eines visches wamme.

er was des kindes amme

unz daz er ez gesande

wol gesunt ze lande.

In zwein nehten und einem tage

940

kam ez von der ünden slage

zuo einem einlande,

als got ez dar gesande.

ein klôster an dem stade lac,

des ein geistlich abbet phlac.

945

der gebôt zwein vischæren

daz si benamen wæren

vor tage vischen ûf den sê.

dô tet in daz weter wê:

der wint wart alsô ein dôz

950

daz si kleine noch grôz

mohten gevâhen.

si begunden wider gâhen.

in der widerreise

vunden si ûf der vreise

955

sweben des kindes barke.

nû wunderte si vil starke

wie si dar komen wære

alsô liute lære.

si zugen dar zuo sô nâhen,

960

daz si dar inne sâhen

ligen daz wênige vaz.

dar ûz huoben si daz

und leiten ez in daz schef zuo in

diu barke ran lære hin.

[...]

1155

Dô der vischære und sîn wîp

über des süezen kindes lîp

sô rehte vlîzic wâren

unz ze sehs jâren,

der abbet nam ez dô von in

1160

zuo im in daz klôster hin

und kleidete ez mit solher wât

diu pheflîchen stât

und hiez ez diu buoch lêren.

swaz ze triuwen und ze êren

1165

und ze vrümekeit gezôch,

wie lützel ez dâ von vlôch!

wie gerne ez âne slege mit bete

sînes meisters willen tete!

ez enlie sich niht betrâgen

1170

ez enwolde dinge vrâgen

diu guot ze wizzenne sint

als ein sæligez kint.

Diu kint diu vor drin jâren

zuo gesetzet wâren,

1175

mit kunst ez diu sô schiere ervuor

daz der meister selbe swuor,

er gesæhe von aller hande tugent

nie sô sinnerîche jugent.

er was (da enliuge ich iu niht an)

1180

der jâre ein kint, der witze ein man.

an sîme einleften jâre

dô enwas zewâre

dehein bezzer grammaticus

danne dâz kint Grêgôrjus.

1185

dar nâch in den jâren drin

dô gebezzerte sich sîn sin

alsô daz im dîvînitas

garwe dúrchliuhtet was:

die kunst ist von der goteheit.

1190

swaz im vür wart geleit

daz lîp und sêle vrumende ist,

des ergreif er ie den houbetlist.

dar nâch las er von lêgibus

und daz kint wart alsus

1195

in dem selben liste

ein edel lêgiste:

diu kunst sprichet von der ê.

er hete noch gelernet mê,

wan daz er wart geirret dran,

1200

als ich iu wol gesagen kan.

[...]

2605

Nû sprechet wie dâ wære

dem guoten sündære.

er was in leides gebote.

sînen zorn huop er hin ze gote,

er sprach: «diz ist des ich ie bat,

2610

daz got mich bræhte ûf die stat

daz mir sô wol geschæhe

daz ich mit vreuden sæhe

mîne liebe muoter.

rîcher got vil guoter,

2615

des hâst dû anders mich gewert

danne ich an dich hân gegert.

ich gertes in mînem muote

nâch liebe und nâch guote:

nû hân ich si gesehen sô

2620

daz ich des niemer wirde vrô,

wande ich sî baz verbære

danne ich ir sus heimlich wære.»

Ich weiz wol das Jûdas

niht riuwiger was

2625

dô er sich vor leide hie

danne ouch diu zwei nû hie.

ouch entrûrte Dâvît

nihtes mêre zuo der zît

dô im kâmen mære

2630

daz erslagen wære

Saul unde Jônathas

und Absalôn der dâ was

sîn sun, der schœniste man

den wîp ze sun ie gewan.

2635

swer ir jâmer und ir klagen

vol an ein ende solde sagen,

der müese wîser sîn danne ich.

ez wære ich wæne unmügelich

daz ez iu mit einem munde

2640

iemen vól gesagen kunde.

sich möhte vil nâch der tôt

gemâzet haben ze dirre nôt:

den hæten si, wære er in komen,

ze voller wirtschaft genomen.

2645

in wâren diu beide

gesamnet in glîchem leide,

beidiu sêle unde lîp.

wâ vriesch ie man oder wîp

deheiner slahte swære

2650

diu alsô garwe wære

âne aller hande trôst?

diu sêle entsaz den hellerôst,

sô was der lîp in beiden

bekumbert umbe ir scheiden.

2655

ez hât geschaffet diu gotes kraft

ein missemüete geselleschaft

diu doch samet belîbe

under sêle und under lîbe.

wan swaz dem lîbe sanfte tuot,

2660

das enist der sêle dehein guot:

swâ mite aber diu sêle ist genesen,

daz muoz des lîbes kumber wesen.

nû liten si beidenhalben nôt:

daz was ein zwîvaltiger tôt.

2665

Diu vrouwe ûz grôzem jâmer sprach,

wan si den jâmer ane sach:

«ouwê ich vervluochtez wîp!

jâ kumbert maniger den lîp,

daz des diu sêle werde vrô:

2670

dem geschiht ouch alsô.

sô bewiget sich manic man und wîp

der sêle umbe den lîp

und lebet in dirre werlde wol.

nû enmac ich noch ensol

2675

mînem lîbe niht des gejehen

des im ze guote sî geschehen:

ist mir diu sêle nû verlorn,

sô ist der heize gotes zorn

vil gar ûf mich gevallen

2680

als den vervluochten allen.

mich wundert, nâch der missetât

die mir der lîp begangen hât,

daz mich diu erde geruochet tragen.

sun herre, muget ir mir sagen

2685

(wan ir hábet der buoche vil gelesen):

möhte aber dehein buoze wesen

über sus gewante missetât,

– ob des nû ist dehein rât

(des ich wol muoz getrûwen)

2690

ich enmüeze die helle bûwen,

dâ mite ich doch verschulde daz

daz sî mir doch sî etewaz

senfter danne maniges leben

der ouch der helle ist gegeben?»

2695

«Muoter», sprach Grêgôrjus,

«gesprechet niemer mêre alsus:

ez ist wider dem gebote.

niht verzwîvelt an gote:

ir sult vil harte wol genesen.

2700

jâ hân ich einen trôst gelesen

daz got die wâren riuwe hât

ze buoze über alle missetât.

iuwer sêle ist nie sô ungesunt,

wirt iu daz ouge ze einer stunt

2705

von herzelîcher riuwe naz,

ir sît genesen, geloubet daz.

belîbet bî iuwerm lande.

an spîse und an gewande

sult ir dem lîbe entziehen,

2710

gemach und vreude vliehen.

ir ensult ez sô niht behalten

daz irs iht wellet walten

durch dehein werltlich êre,

niuwan daz ir deste mêre

2715

gote rihtet mit dem guote.

jâ tuot ez wirs dem muote,

der guotes lebens wal hât

und er sich sîn âne begât,

danne ob es enbirt ein man

2720

des er teil nie gewan.

ir sît ein schuldec wîp:

des lât engelten den lîp

mit tegelîcher arbeit

sô daz im sî widerseit

2725

des er dâ aller meiste ger:

sus habet in unz er iu wer

in der riuwen bande.

den gelt von iuwerm lande

den teilet mit den armen:

2730

sô müezet ir gote erbarmen.

bestiftet iuwer eigen,

swâ iuwer wîsen zeigen,

mit rîchen klôstern (daz ist guot):

sus senftet sînen zornmuot

2735

den wir sô gar verdienet hân.

ich wil im ouch zu buoze stân.

vrouwe, liebiu muoter mîn,

diz sol diu jungest rede sîn

die ich iemer wider iuch getuo.

2740

wir suln ez bringen dar zuo

daz uns noch got gelîche

gesamene in sînem rîche.

ich engesihe iuch niemer mê:

wir wæren baz gescheiden ê.

2745

dem lande und dem guote

und werltlîchem muote

dem sî hiute widerseit.»

hin tet er diu rîchen kleit

und schiet sich von dem lande

2750

mit dürftigen gewande.

Ez wâren dem rîchen dürftigen

alle genâde verzigen,

wan daz er al sîn arbeit

mit willigem muote leit.

2755

er gerte in sînem muote

daz in got der guote

sande in eine wüeste,

dâ er inne müeste .

büezen unz an sînen tôt

2760

spilende bestuont er diese nôt.

er schûhte âne mâze

die liute und die strâze

und das blôze gevilde:

allez gegen der wilde

2765

sô rihte der arme sîne wege.

er wuot diu wazzer bî dem stege.

mit marwen vüezen ungeschuoch

streich er walt unde bruoch

sô daz er sînes gebetes phlac

2770

ungâz unz an den dritten tac.

Nû gie ein stîc (der was smal)

nâhe bî einem sê ze tal.

den ergreif der lîplôse man

und gevolgete im dan

2775

unz er ein hiuselîn gesach:

dar kêrte der arme durch gemach.

ein vischære hete gehûset dâ,

den dûhte daz niender anderswâ

daz vischen wæger wære.

2780

den bat der riuwesære

der herberge durch got.

von dem dulde er merren spot

danne er gewon wære

als im der vischære

2785

sînen schœnen lîp gesach,

er wegete daz houbet unde sprach:

[...]

Sus wart daz gnâdelôse wîp

ergetzet leides des ir war.

got sante si wunderlîchen dar

ze vreuden in beiden.

3940

sus wâren si ungescheiden

unz an den gemeinen tôt.

als ir Grêgôrjus gebôt

und ir ze büezenne riet,

dô er von ir lande schiet,

3945

mit lîbe und mit guote,

mit beitendem muote,

daz hâte sî geleistet gar

sô daz ir niht dar an war.

swaz si ouch jâre sît vertriben

3950

sît si ze Rôme ensamt beliben,

diu wâren in beiden

ze gote alsô bescheiden

daz si nû iemer mêre sint.

zwei ûz erweltiu gotes kint.

3955

ouch erwarp er sînem vater daz

daz er den stuol mit im besaz

den niemer vreude zegât:

wol im der in besezzen hât.

Bî disen guoten mæren

3660

von disen sündæren,

wie si nâch grôzer schulde

erwurben gotes hulde,

dâ ensol niemer an

dehein sündiger man

3665

genemen bœsez bilde,

sî er gote wilde,

daz er iht gedenke alsô:

«nû wis dû vrevel unde vrô:

wie soldest dû verwâzen wesen?

3970

sît daz dise sint genesen

nâch ir grôzen meintât,

sô wirt dîn alse guote rât:

und ist daz ich genesen sol,

sô genise ich alsô wol.»

3975

swen des der tiuvel schündet

daz er ûf dén trôst sündet,

den hât er überwunden

und in sînen gewalt gebunden:

und ist ouch sîn sünde kranc,

3980

sô kumet der selbe gedanc

mit tûsentvalter missetât

und enwirt sîn niemer mêre rât.

dâ sol der sündige man

ein sælic bilde nemen an,

3985

swi vil er gesündet hât,

daz sîn doch wirt guot rât,

ob er die riuwe begât

und rehte buoze bestât.

Hartman, der sîn arbeit

3990

an diz liet hât geleit

gote und iu ze minnen,

der gert dar an gewinnen

daz ir im lât gevallen

ze lône von in allen

3995

die ez hœren oder lesen

daz si im bittende wesen

daz im diu sælde geschehe

daz er iuch noch gesehe

in dem himelrîche.

4000

des sendet alle gelîche

disen guoten sündære

ze boten um unser swære,

daz wir in disem ellende

ein alsô genislich ende

4005

nemen als sî dâ nâmen!

des gestiure uns got. âmen.