BIBLIOTHECA AUGUSTANA

 

Konrad der Pfaffe

um 1170

 

Das Rolandslied

 

Verse 4000 - 4999

 

______________________________________________________________________________

 

 

 
 
4000

ir nehain trúte genesin.

di ê zu ir herren

uorderoten lehen,

daz si Roulanten sluogen

unt daz houbit fur in truogen,

4005

di wurden alle swifte;

si waren gerne uon deme strite.

di ê waren sam der lewe ergramt,

di wurden senfte sam daz lámp;

di sich ê uermazen,

4010

do si uor ir herren sazen,

si wolten stoeren sent Dionisien hús,

diu uermezenhait chom ubel uz:

wi unhohe si wagin

di des chuoniges golt namin.

4015

si wanten si waren piderbe;

ir uober muot gelac des tagis da nidere.

 

Do di cristen wol gár

beraiten ir zwelf scár

unt ander warte habeten,

4020

Adalrot dar zuo drauete;

er sprach: «bistu hi, Roulant?

Machmet hat dich mir zu gesant.

daz ist min lehen

uon Marsilie minim herren,

4025

daz ich din houbit abe slahe

unt iz fuor den chunc trage.

Crist der din herre

ist dir hiute uil uerre;

sin wirt uil uobele ‹an dir› gesconet.

4030

wi hat dir nu Peter gelonet?

nu ist er ze Rome,

nu bistu hi zedem tode.

tump was der kaiser din ohaim;

sin wistum uobel dar an scain

4035

daz er dich hinter im uirliez.

ich bewille hiute min spiz

in dinem herce bluote

durch dine groze uobermuote.

dinen potich wirfe ich in den graben:

4040

Yspania mac wol uor dir uride haben

unt al werlt chrone.

du ne gesagest iz niemir mere ze Rome.»

 

Do antwirt im Roulant:

«du forderost hi zemir ain groz phant:

4045

min houbit wilt du fur bringen.

Durndart muz mir hiute dingen.

ich hore an dinem chose:

du bist ain zage uil bose.

uil drate ledige ich daz lehen.

4050

rufe Mahmete dinem herren,

ob er dir iht heluen welle.

ich gefrume dich zu der helle.

du bist min rechtir scol:

des cinses gewer ich dich wol.»

4055

er uieng in oben zeder achselen an,

er zetailte ros unde man.

«di rede scoltu mir gebuzi[n],

Machmeten zetrit ich unter minen fuzin

unt allez daz hie mit im ist.

4060

daz gebiutet mir der heilige Crist.

dinen botich gibe ich den himel uogelen.»

er ramte sin obene,

er tailte ros unt satelpogen,

deiz tot ze der erde bechom.

4065

daz swert warf er umbe in der hant.

di Franchen riefen alle samt,

mit gelicher stimme huoben si:

«Monsoy!»

daz was des kaiseres zaichen.

4070

«sent Peter mac mir baz geheluen,

daz schinet hi zestét,

denne dir din herre Mahmet:

du ligest da nidere.

Karl was wise unt biderbe,

4075

der mich hie liez.

ich han gelaistet daz ich dir gehiez.

iz ist wol erhaben,» sprach der helt Roulant,

«nu gedencket der swerte an der hánt,

ir tiuren uolcdegene!»

4080

do huben si sich dar in gegene.

«Ditze ist ain fraissam slác:

ich geriche in ob ich mác,»

sprach der herzoge Garpín,

«du bist der rechte scole mín.»

4085

er ramte sin gegin den brusten,

der scaft prast zestuchen.

«du hast mir den bruder erslagen,

ich wil dir warliche sagen:

mac dich dehain wafen gewinnen,

4090

so ne chumestu nimer hinnen.»

er sluoc in mit deme swerte

uf den helm herten

ainen uermezenlichen slác.

«nu ist din iungister tác,»

4095

sprach der helt Roulant.

er sluoc in uber des schiltes ránt,

mit deme guoten Durndarte

uersnait er in harte,

daz er sich pegunde naigen:

4100

tot uiel die haiden.

 

Do uachten di waren gotes dinist man,

soz guten knechten wol gezam.

haiden di gesellen

pliesen ze geuelle,

4105

sam si tiêr iageten.

di scar si umbe habeten;

daz gedrenge wart da fraissam,

da strebete man fur man.

der haiden michel magencraft,

4110

uil manigen eskinen scaft

gefrumten si uffe di cristen.

ínoch wolte si got gefristen,

er gestarcte wol di sine.

ia wonten si in deme wige

4115

sam der lewe der da winnet

unt rechte zornen beginnet,

doch ir angest waren groz.

sam der smít tingelet uf den anbóz,

so daz isen ist ingluote,

4120

. . . . uf schilte unt uf huote.

si warten alle des lewen.

do erhalte sich der degen,

den schilt warf er zeruche,

er hiwe im aine luche

4125

lange unt wite

ouch chom im in der rechten cíte

sin lieber her geselle Witel,

ain helt chune unt snel,

Clargis unt Arthan

4130

unt alle Roulantes man,

di sine not herten,

mit ir guten swerten,

mit spiezen unt mit geren

losten si ir herren.

4135

si slugen si uaste widere:

der uan gelac da nidere.

der scal wart in uergolten

mit starchen uerchwunten.

 

Roulant was ergremt harte:

4140

mit dem guten Durndarte

gefrumte er manigen toten man.

des swertes site was so getan,

swa erz hin sluoc,

daz iz durch den stal wuot,

4145

sam er ware lintin.

di toten lagen in allenthalben sin

sam die hohen perge.

daz pluot uon manne uerhe

fulte uelt unde graben.

4150

niemen nemachte den wec gehaben:

si wuten in dem bluote unz an die chnie.

daz ne uraister ê nie,

daz unter deme himile ie gescahe

daz diu scár gar belage,

4155

daz ir nehain man genas.

daz buoch urchundet uns daz:

durch Machmetes liebe

heten si maniger slachte zirde

gefuret an di wal stát.

4160

Roulant hiwe im daz phát

rechte dar in gegene.

da uielen Machmetes helede

zu siner gagenwurte,

daz er sich selben nine werte,

4165

noch den sinen wolte heluen,

swie uil si in an geriefen.

 

Roulant unt di sine

cherten mit micheleme nide

an der haiden bette hús.

4170

sine blasare musen dar uz:

si erslugen si alle samt.

do sprach der helt Roulant:

«wa bistu nu, Machmet?

nu were dich hi zestete!

4175

di dine sint alle erslagen, –

daz han ‹ich› dir zelastere getan,

 

Roland stürmt den Tempel Mahomet

(P, fol. 57v)

 

din hus wil ich prechen,

macht duz nu rechen? –

di dine plasare.

4180

hiute ware du uil mare,

nu bistu worden stille.

dine golde garwen dille

muzen alle zu der erde.

ich gelege dich unwerde,

4185

ich zetrite dich unter den mist.

der din uil pose list

ist an daz ende chomen;

din trugenhait diu ist gare uerloren.»

do hiz er die wende

4190

in allen uier enden

zu der erden stoze[n].

do wolten sin geniezen,

di iz da nider slugen,

daz golt daz si uf huoben.

4195

daz ersach der helt Rolant:

«ich bite uch herren alle samt

durch den ewigen got:

lat iu ditze golt rót

wesen ummare

4200

wider uwerem schephare,

ditze scone gestaine:

ia ist iz unraine;

lat iz durch den waren gotes sun –

iz nemac uns zegote nicht gefrumen,

4205

want iz uns zenichte entouc –

unt habet daz urloup,

swer morgen ze dirre zít lebe,

daz er im selbe neme

swaz im hie geualle.

4210

iane wizen wir noch alle

wi iz noch hiute ergat.»

wol geuiel in der rát:

si traten iz unter die fuoze;

unter dem miste siz lizen,

4215

sam iz bli ware.

si lobeten alle ir schephare.

 

Do chom Falsaron:

uon der erden Dathan unt Abiron

was er uerre geuaren.

4220

ain guldinen aren

furt er an deme schilte;

uor der scár er spilte.

uon sinem helme da schain

der lichte karfunchil stain

4225

unt ander werc spahe;

er was riche unt mare.

er sprach: «bistu hie, Oliuir?

mir ist gesaget uon dir,

du sist der cristen uor uechte.

4230

ich han hi gute chnechte,

zwelf tusent man.

nu rit du, helt, unter minen uán:

ich hilue dir gerne hinnen,

wilt du, helt, dingen

4235

dar zu dem chunige Marsilien:

dune maht iz nicht gewideren.

behalt lip unt rum.

wilt du des nicht tun,

dinen botich wirue ich den uogelen,

4240

din houbit dar obene

steche ich an minen spiz,

also ich deme kunige gehiz,

unt furez ubir al dise berge,

iz ne si daz ich uil drate ersterbe.»

 

4245

Do antwirt im der wigant:

«ich han ouch liute unt lant

also lange so got wil.

mich ne dunkit ir boruil

di du her hast bracht.

4250

ich han sin anderes gedacht:

ich han wider minen schephare gelobet,

daz ich nehainer slachte uoget

wider in niemmir gewinne.

uil bose wirt din gedinge:

4255

uor gote ‹bistu› uerfluchet,

daz er din nine ruochet.

din botich unrainen,

din golt unt din gestaine

wirfe ich in di puze:

4260

din leben ist unnuze.

ich ne furchte nehaine dine dró.»

geliche huben si sich dó.

baide si sprancten,

ain ander si an ranten.

4265

Oliuir durch den haiden stach,

zv der erden er in warf.

wider zuchter den spiez,

unter di haiden er rief:

«wanu sine scar gesellen?

4270

di in rechen wellen,

di heuen sich her zu mir,»

sprach der helt Oliuir.

michel froude unter den cristen was.

si drungen in auer naher báz.

4275

di cristen riefen «monsoy, monsoy!»

uil harte erchomen di,

die zaller uorderiste waren,

want si michel wunder sahen,

da di gotes herten

4280

mit den spiezes orten,

scharfen unt wachsen,

wurfen si uon den rossen.

si cherten an die dicke,

si ualten in ainem blicke

4285

mer denne sechs tusent mán.

der strit was uermezzenliche erhaben.

uon Almerie Tortan

mit ainem golde garwen uán

stach er den grauen Orten,

4290

daz er uiel toter.

er ware gerne uon im danne,

do uersumte er sich zelange.

do sprach der helt Maximin:

«des nemac sin:

4295

dune scolt so genozin nicht hinnen uaren.»

du hup er uf den arm,

daz houbit er ime abe swanc.

do wart ein michel gedranc,

da di gotes herstrange[n]

4300

den Falsarones mannen

zezarten di schilte.

so uaste si in an gesigeten,

daz in der stal nehain frum was.

di ir wol gezirten helmuaz

4305

waren alle bli waich.

swaz sin daz swert begraif,

daz muse allez in zwai.

Ilmar uil lute da schrai,

der herzoge uon Agrentin:

4310

«di cristen muozen wol chuone sin:

ir schilte noch ir ringe

nemac niemen gewinne.

ditze ist diu aller maiste nót:

diu unser scar liget tót;

4315

wir uechten allen disen tác,

daz ich nehainen frumen swertes slác

ersach uon unser nehainem.

ich ne wil so zagelichen nicht hinne scaiden:

ich uersuoche mich ê,

4320

swiz uber mich ergé.»

daz ros er mit den sporen nám,

er cherte rechte in gegen dem uan,

er stach Marcellen,

den grauen uon Uigennen,

4325

durch ainen schilt dicken

den spiz unz an daz mittel.

di haiden huben alle samt

«fore ualdant!»

si cherten uaste uf si.

4330

di cristen scár rief «monsoy, monsoy!»

 

Di cristen fur traten;

mit den ir tuwerlichen wafen

si frumten ze allen stunden

toten unt wunden.

4335

daz bluot uber uelt ran.

si zeslugen ros unt man.

di toten hin runnen,

wie iamerliche si swummen!

uil manige ertrancten sich selbe.

4340

cristen die helede

uaste durch drungen,

fluchte si sie dwungen.

si slugen in uf den rucken

di schilde al zestucken.

4345

swaz gebaines dar unter was,

fur war waiz ich daz,

di musen alle in den strán.

Falsaron unt sine man

fluzen after furhe.

4350

Oliuir drauete dar uobere

unt sine scargenoze.

in dem walfloze

belagen si tot alle samt,

daz ‹er› da niemen lebentigen uant

4355

wan sunter ainen,

der gestilte uf ainem staine.

Oliuir in ersach,

uil uobelichen er zu im sprach:

«wanne sagestu mir, iunc man:

4360

war hastu Falsaron getan?

ia tatestu ungetruwelichen,

woltestu im geswichen,

so schidestu ubele hinnen.

du scholt nach im swimmen.

4365

suche dinen herren,

di scar scoltu im gemeren.»

den spiz er uf huop,

uober daz houbit er in sluoc,

daz im di ougen ‹uz› sprungen.

4370

di scár lac in dem blute gar berunnen.

Do chom der chunc Cursabile

geuaren uf sinem marhe

unter ainem liechten helme.

zwelf tusent siner helede

4375

rieten nach ir herren.

si schienen alle sam die sternen

uon golde unt uon gestaine.

di waren uermezen haiden.

der chunc was herlichen gâr,

4380

er sprancte uerre uon siner scâr

uber uelt daz ruhe.

ia enbait er uil chume

daz er Turpin uant.

do rief er uober schiltes rant:

4385

«bistu hi, Turpin?

uil gewis scoltu des sin:

der dich mit golde wage,

daz ich iz da fure nine name

daz ich dich ersehen han.

4390

du hast mir uil zelaide getán.

wa mahtestu uf dirre erde

iemir baz ersterbe?

ich bin ain chunc uil rich.

nu stich du, helt, widir mich.

4395

du bist der aller chunisten ain,

den diu sunne ie bescain.

din houbet fure ich hiute hinnen

Machmet zeminnen

unt ze eren minem chunne,

4400

daz man mir daz lop imer mer sunge.»

 

Do sprach der biscoph Turpin:

«der heilige Crist scol der mittelare sin,

der min heilare ist,

des achtare du bist.

4405

ich bin sin dinistman.

din riche scol ain ander chunc han.

din schilt ist uil dunne,

uil waich ist din brunne.

din gestaint helm also liecht

4410

der nemac dir hiute gefrumen níet.

dir ist uil nahen der tot;

die tiuele wartent din dort.»

daz ros hiwer mit den sporen.

. . . . durch schilt unt durch satelpogen,

4415

durch den lip nal richte.

den spiez zuchter uf mit chrefte.

er erriet in uf di helm guphen,

er zart in al zestuchen.

tot uiel er unter si.

4420

di cristen riefen: «monsoy, monsoy!»

 

Turpin unt di sine

di huben sich mit nide

an di uil dicken scâr.

si getaten blaich uâr

4425

manigen uermezen man.

daz fûr uz dem stale bran.

da uielen ze allen stunden

di toten uber di wunden.

niemen chan iu gesagen daz,

4430

welch not da was,

da der marcgraue Waldram

stach den haidenischen man

daz er den uan hin warf.

tot uiel er unter daz marh.

4435

di haiden musen wenchen.

di waren gotes chemphen

lizen si luzel rasten.

uber drie raste

hort man si we scrigen,

4440

des tiueles higen.

di helme si uerscarten,

di halsperge si in zezarten.

diu starche hitze si muote;

si waren rechte sam in ainer gluote

4445

baidiu uzen unt innen.

di cristen uachten wol nach ir willen.

 

Di haiden getorsten nicht geflihen;

uil manige tot uielen,

selbe si sich erdrungen.

4450

der tiuel het in an gewunnen

baidiu lip unt di sele.

do wolt der himelische herre

di sine wol gefristen:

ia chom uober di cristen

4455

ain trôr uon dem himel touwe,

ain chuole unter di ougen.

daz gescach an der none zît:

sich eriungete aller ir líp,

si wurden starch unt ueste –

4460

des engulten di laiden geste –

sam si des morgenes waren.

do si den trost uon himele ersahen,

si riefen «monsoy, monsoy!»

si drungen uaste durch si.

4465

der helme wart ain michel scál,

groz der haiden ual.

ne weder schilt noch gesmide

neschirmit in dem libe

minere denne der swam.

4470

si zeslugen ros unde man

mit ir scharphen spiezen.

di gote musen in dem bluote hin fliezzen.

der site was unter guten knechten:

si cunden wol uechten

4475

mit spiezen unt mit geren;

des flizten sich di herren.

di furt der biscoph Turpin:

er ualte in allenthalben sin

manigen haiden cuonen.

4480

di sconen uelt bluomen

wurden alle bluot uár.

si erslugen di so gár

daz si niemen uf recht funden.

ouch uerluren si dar under

4485

uier unt sehzec man

uielen uon des biscofes uán.

 

Malprimis uon Ampelgart

mit ‹der› aller maisten hochuart

furter aine egesliche scár,

4490

zwelf tusent riter wol gár,

uermezen helede.

ia lucht ir geserwe

uon schilten unt uon helmen

also uon himele di sternen.

 

4495

Egeris furt ain uan,

dar unter ainlif hundert mán;

di riefen hin ze himile,

si huben sich dar ingegene.

Egeris ernante,

4500

di haiden er anrante.

er stach Malprimis den herzogen

daz er toter zu der erde bechom.

Ciciron clagete sinen herren.

mit sinem scarphin geren

4505

ramt er sin ze den brusten.

der schilt was so ueste,

herte sine ringe,

erne macht sin nicht gewinne.

Alrich bi im was;

4510

ain spiez also wachs

stach er Cicirone

daz im da ze den oren

daz uerch bluot uz spránc.

da wart ain uil michel gedránc

4515

uon den haiden uf di cristen:

uil harte si sich gemisten.

 

Do uachten wo des kaiseres man

so iz guten knechten wol gezam.

ir nehain gedacht an den líp.

4520

ir herze stunt in alle zít

†also in da uon gehaizen was.

ie baz unt baz

statigent si sich zetugente.

si slugen tiefe wunden.

4525

da macht man scouwen

manigen haiden uerhouwen.

diu ir scár also dicke

gelagen an dem gewicke

sam die hunte unraine:

4530

nehain arzet ne kunde si gehailen.

swaz si ir trafen

mit den ir tuwerlichen wafen,

di neirten si nicht mere.

des lobeten si den himilischen herren,

4535

der di wunter hete zu in getan.

si uerluoren ain unt sibenzec man.

 

Egeriers ain helt chuone unt snel

unt der haideniske chunc Amurafel

die scar cherten an ain ander.

4540

ich sage íu michel wunder:

ain grabe was da inzwisken,

da wolten sich di haiden gerne fristen.

Egeriers sprancte dar ubere,

ia stach er dem kuonige

4545

durch den schilt unt durch di hant.

ia warf in der edele wigant

dem rosse uober di goffen.

in dem bluote lager betochen.

sin satel der was silberin.

4550

er sprach: «ia du armez chungelin,

waz suchtestu nu hí?»

diu scar rief «monsoy, monsoy!»

 

Ein haiden hiez Prutan,

der rante Egeriers an:

4555

«daz wir dich so erbarmen,

daz wort muostu hi zestete erarnen!

er stach in durch ain schilt uesten.

do schirmt im uor sinen brusten

daz tiwerliche gesmide.

4560

ia rach er sih mit nide:

er stach in hinten durch den líp –

daz buoch uns urchunde git –

den wizen uán.

der herzoge Muralan

 

Christen und Heiden im Kampf

(P, fol. 63r)

 

4565

er rief uil gezit:

«wir haben hi ain sconez uolcwic!»

der wize uan wart rót.

Prutan gelac da tót

unt sin herre Amurafel

4570

unt ander manic helt snel.

 

Di cristen durch drungen si.

si riefen ander stunt «monsoy, monsoy!»

da uielen di haidenisken man

daz iz iu nieman gesagen kán.

4575

si uielen dicke unt dicke:

wec unt gewicke

was allez perunet.

di christen heten da gefrumt

manigen helm prunen

4580

blaich unt uerhouwen,

manige sele zu der helle.

der poticke geuelle

was harte egeslich.

da uiel der gotes gerich

4585

 uober di wuot grimmen.

uz den gotes kinden

geuielen ahtzec unt sibene:

di urouwent sich iemir da zehimele.

 

Amarezur huop sich dar,

4590

er furt aine herliche scar,

zwelf tusent haiden.

daz edele gestaine

lucht uz in uerre.

iz newart uf der erde

4595

nie nehain chunc so here geborn,

waren si durch daz rechte uz chom,

erne scolt ir wol trost haben.

ir schilte waren mit golde beslagen,

geziret ir helme.

4600

si waren chuone helde;

gestaine uober gestaine,

doch si waren haiden,

habeten si mere denne genuoc.

si uerlait ir groz ubermuot,

4605

di Luciferen den alten,

hibeuor ualte:

alle di sich ir unterwindent,

di werdent alle hi geschendet;

di sint sine genoze,

4610

di werdent zu im uerstozen.

mit ubermuote chomen si dar.

Amarezur sprancte uz siner scár;

er furt ain golde garwin spiez,

unter di christen er rief:

4615

«ir habet ain lutzel uolc:

uwer uechten entouc.

wer ist uwer laitare?

wi gerne ich in sage!

wolt er sich nennen,

4620

ich wolt in gerne erkennen:

ob ich in ersluge,

wes macht ich mich denne ruomen,

ob er sin wol wert si?»

«ich bin hie genuoc nahen bi,»

4625

sprach der helt Samson,

«du must des todes bechoren.»

mit nide sie gesprancten,

ain ander si an ranten;

der haiden uermiste,

4630

Samson mit listen

gegen dem hercen er in erchos:

da uiel uerchlos

der uil mortgire man.

iz was uermezenliche erhaben.

 

4635

Do uachten wol di christen,

also si got wolte gefristen:

di waren gotes strangen,

die lieben not gestallen,

di tiuren uolcdegene

4640

di hiwen in in gegene

mit spiezen unt mit swerten.

manigen helm herten

frumten si uerhouwen.

iane macht mit den ougen

4645

niemen den anderen erkennen.

der stal muse da prinnen

sam er holz ware.

der haiden werc uil spahe

pelac in der lachen

4650

mit bluote betochen.

got gab in sin hail:

daz minner tail

wart lobelichen sigehaft;

di uil michelen haiden craft

4655

frumten si zu der helle.

da gelagen der gesellen

acht unt hundert mán,

di zedem paradise sint geuaren.

 

Daz buoh chundet uns daz gewis:

4660

uon Tortulose Targis

der furt ain egesliche scár,

di heten gute wicgár,

zwelf tusent helede:

ir brunigen waren drilihe.

4665

mit in waren dar chomen

siben hundert hornbogen;

di uermazen sich starke,

si erledigeten im sine marche,

want Targis der marcgraue was,

4670

do er ze Tortolose saz.

do diu purch wart gewunnen,

do was er da uon entrunnen

zu sinem herren Marsilien.

do hugeter auer widere

4675

mit sinen golt wín;

uil willic waren si im,

want er milticlichen gab

die wile er der marche phlác.

inoch heten si behalten

4680

ain got alten,

den si uon Tortulose ernerten

unt an in fliezeclichen petten:

Appollo hiez sin name.

den furten si unter uan:

4685

si genigen im alle uil tiefe;

uil lute si in an riefen,

er hulfe in zu ir willen:

si swicten sam die stummen.

 

Do Anseis daz ersach,

4690

zu sinen gesinden er sprach:

«di sint alle uaige.

nu sehet ir wie di haiden

petent an des tiueles getruoc;

nu tuot irz durch den ewigen got:

4695

habet uaste uweren gelouben;

si wellent uns sin berouben!

gedencket der swerte ander hant,

eruechtet uwer erbe lant!

heuet íuch frolichen dár!

4700

neruchet umbe ir braite scár:

sine mugen uns nicht gewerren.

wir dinen ainem herren

der unsich niemir uerlat;

si geuellet ir hochuart

4705

mit libe unt mit sele.

‹durch› des heiligen Christes ere

so wil ich der erste sin.

er ist selbe der scolare min.»

den scilt er uf ruchte,

4710

den spiez er uf zuchte,

mit grimme hiwer den uolen;

er uorderote sinen scolen,

Targis dar ingegene,

gelich ainem dit degene,

4715

unt uerstachen die spieze,

daz si si beide uerliezin.

si griffen nach den swerten,

der champh wart herte:

Targis uacht umbe ere,

4720

Anseis umbe di sele,

Targis umbe ertriche,

Anseis umbe daz himilriche.

ir slege waren fraissam:

daz fûr uz dem helme pran.

4725

Targis der wigant

sluoc in uf des schiltes rant,

er zart in an die buochelen:

daz swert prast im zestuchen.

«ist», sprach er, «daz ich gemac,

4730

ich uergilte dir hi zestete den slác!»

er zesluoc im di hirnreben.

«swem got daz hail wil geben,

der mac nu uor dir samphte puwen.»

er uiel tot unter aine studen.

 

4735

Haiden di grimmen

di wolten gerne unter dringen

der cristen scâr.

si waren alle ain uâr,

si waren aines muotes;

4740

sine uorchten libes noch gutes,

si waren rechte not gestallen:

durch not muse uallen

der haiden groz ubermuot.

da gelac manc helt guot,

4745

di deme riche wol gezamen

ob si cristen waren.

da wert unlange

dehain poge strange:

si waren alle schiere uerlorn:

4750

uon gote daz chom.

di christen sich erslugen

daz in der lip begonde muden;

san gewunnen si wider ir craft.

di haiden wurden scadehapht:

4755

di uachten zwiuelichen

unt enmachten idoch nicht entwichen;

si bechorten alle des todes.

in di scar Herodes

sint si iemir mere:

4760

der tiuel na[m] di sele.

der christen gelac tot dar under

acht unt driu hundert.

 

Dar chom Eschermunt,

der lait zwelf tusunt,

4765

der herzoge uon Ualeterne,

di uachten alle gerne.

Engelirs im ingegene

der het ainlif hundert helede.

Eschermunt der wigant

4770

rief uober schiltes rant:

wer laitet dise scâr?

si ist herlichen wol gar,

si gezame wol aine[m] richen man:

iwer schilte sint lussam,

4775

di helme also wolchen liecht.

der riter nehabet ir nicht

wider susgetaner crefte:

ia fure ich guter chnechte

zwelf tusent man,

4780

di ich mir erwelt han

uz allem minem riche.»

er antwirt im uermezenliche:

«wilt du wizen minen namen?

wirne furchten nehainen dinen michelen magen.

4785

ich sage dir uil gewis:

daz liut haizet mich Engelirs;

mir dienet Wasconia.

Marsilie dem chunige

han ich uil zelaide getan;

4790

nu geschit dir hiute lichte sam,

des han ich guten willen:

dune chumest niemir hinnen.»

do ersprancte er ander stunt.

ia stach im Eschermunt

4795

den spiez durch di porte;

daz werc wider stunt dem orte:

got in wol bewarte

daz er im an dem libe nine scadete.

 

Engelirs chom im zenahin:

4800

mit dem spieze nemacht er sin nicht geramen.

Chlarmien er umbe graif,

daz swert nehain stal uermait:

nal mitten er in erriet,

den helm er uerscriet

4805

zetal durch sin houbit.

er sprach: «ich han dir erloubet,» –

er genaic Clarmie –

«du scolt in disem uolcwige

dine tugent hiute erzaigen.»

4810

do cherter an di haiden:

er sluoc si zallen stunden

daz di fiures funchen

uz den helmen sprungen,

do si zesamene drungen.

4815

der haiden scar was also dicke:

mit uan uf gerichten

heten si si bestanten.

di cristen ain ander wol manten:

doh si waren umbe uangen

4820

mit angesten uil manigen,

ir groziu tugent gab in di craft

daz sie nie wurden zwiuelhaft.

di schephte si niedir liezen:

iane macht uor den guten spiezen

4825

ir schilte nehaine wile erweren.

Ludewic der degen

sluoc da uor Neren:

do waren in die herren

paide samt enphallen.

4830

inoch was iz unergangen:

Pandolt unt Martian

cherten gegen der haiden uan.

Nerpa in da werte:

da wart der wic herte.

4835

di swert herlichen chlungen.

di haiden we sungen:

si grinen sam di hunde;

si uielen alle stunde

mit blute berunnen:

4840

ir scar begunde harte dunnen.

 

Engelirs cherte gegen der herte;

da frumt er mit dem swerte

manigen haiden toten,

manigen helm uerscroten,

4845

manige tiefe wunden.

got behilt in wol gesunden,

daz im an deme libe nine war.

im geuiel uz der scar

achtzec unt hundert man.

4850

di haiden wurden alle da erslagen.

 

Nu horen wir di buoch iehen:

Hatte, ain warer gotes degen,

der was unter den zweluen

ze ainem tiuren uolcdegene

4855

herlichen zeuoruechten erchoren:

wir sculen in uon rechte loben.

er laite unter sinem uan

ainlif hundert man

der rechten not gestallen.

4860

an den was nehain mangel:

si waren uzen unt innen

beslozen mit uesten ringen.

der stal schirmtte dem ulaische,

diu heilige minne dem gaiste.

4865

diu ir sterche des libes

gert in des wiges.

daz der gaist gesigete,

hin ze himele si digeten.

si manten ir schephare

4870

daz er der sele fride ware

wider des tiueles nit.

sine gebetten nie umbe den lip:

daz si da wol erzaicten,

do si ir spieze naicten

4875

gegen zwelf tusent mannen:

der ne chom nie dehainer dannen.

di laite der chunc Estorgant;

ain uan furter an der hant,

dar an stunt ain eberswin

4880

alrot guldin.

perelen unt gestaine

luchte uon den haiden

sam diu prinnenten oleuaz.

lutzel half si daz:

4885

untruwe nemac nicht gesigen,

diu hochmuot muz ie unter geligen.

 

Der chunc lie den uan waiben,

al hin unt her swaiben.

daz ersach der helt Hatte:

4890

owi wol er im gestatte!

zesamene si stachen,

di schilte si in zeprachen;

der uesten stalringe

nemachten si nicht gewinne.

4895

helede wunter chunen

mit swerten si sich untersluogen.

da uacht der chunc riche

uil harte riterliche:

mit ellen er dar wác

4900

manigen uermezenlichen slác.

Hatte sich wol gerach:

unter dem schilte er in stach,

er uerwunt in uil sere:

do gezwiuelot der herre.

4905

do er der wunden enphant,

do wolt der chunc Estorgant

gerne uon im widere.

Hatte der biderbe

erraichte im di hals ueste:

4910

er zehiwe im di nestel,

er sluoc im abe daz halsbain:

daz houbet uiel ain halp uf den stain,

der potih uiel ander halp zetal.

diu christen scar uber al

4915

mit micheler froude huoben si

«monsoy, monsoy!»

 

Di haiden ir zaichen

pegunden dar in gegene rufen.

mit michelem scalle

4920

stachen si zesamene.

da wuochs der helle ir gewin,

uil michel not wart da unter in.

ain helt uil got,

Regenfrit uon Tagespurc,

4925

daz swert er umbe graif,

manigen haiden er uersnait.

si zeslugen manigen guten iachant,

manigen schilt uon der hant.

Hillunc unt Uastmar

4930

zehiwen in die goltmal:

da uielen genuge.

si smideten ungefuge:

si slugen iaspis unt smaragede

alle uon ain ander.

4935

da wart michel not unde wuoft,

den cristen ware helue durft.

 

Di haiden sich erhalten,

mit michelem gewalte

slugen si widere.

4940

der christen gelac da nidere

uirhundert unt zehene

in dem urone segene,

da diu chindelin inne furen

die durch got gemarteret wurden.

4945

si wurden wol enphangen

mit engelsange:

dinten si wol ir herren,

nu lonet er in mit grozen eren.

 

Alrich uon Normandîe

4950

unt ander gesellen sine,

Witrant unt Otnant,

Pillunc unt Sigebant

unt ander manc helt guote

waren gescaffet zehuote,

4955

swelher scar sin durft geschahe,

daz sie den frum waren:

si heten zwai tusent man.

also si horten sagen

daz Hatte was in noten,

4960

uf di scar si cherten.

sper halp si in zu stachen,

mit willen si sich rachen:

si taten da uaigen

manigen riter haiden,

4965

manige prehende wunden.

si funden Hatten gesunden.

uil grozen scaden si gewunnen;

fluochte si si dwungen.

si fluhen uober furhe:

4970

ir gelac so uil da nidere

daz si sin niemir mere gezam:

si erstachten sich selben in dem graben.

noch chom Beringer,

anderhalp tusent furt er,

4975

di uil wol uz erwelten,

di al daz wol erherten

daz si gote gehizen:

wie war si daz liezen!

daz heilige cruce si erten,

4980

want si daz zaichen an in furten:

des wart in wol gelonet sit.

uon in wissagete der herre Dauid:

«got hat si gehohet,

er hat si gechronet.

4985

ir angest hat er gewideret,

ir uiante genideret.

ir bluot rief hin zehimele uon der erde:

daz erhort unser herre,

er hiez iz balde rechen:

4990

in dem prinninden beche

habent si di tiuele uersazet,

di si niemir uon in uerlazent».

 

Der haiden uan

uolgoten zwelf tusent man.

4995

di laite Stalmariz:

riterlichen stach er sin spiz

durch Beringeres schiltes rant.

daz uergalt im der wigant:

mit ainem spieze wahsen